Itanagar, Lber 27: Ka seng nongrep ha ka thain jong ka wah Siang, ka Siang Indigenous Farmers’ Forum (SIFF) bad ka Indigenous Rights Advocacy Dibang (IRAD) ki la pynpaw ba kin pynlong da ka jingiakhih kaba tyngeh lada ym pynkut noh ha kaba iadei bad ka jingthmu ban pyntreikam ia ka hydropower project kaba10,000 MW hapoh ka wah Siang ha Arunachal Pradesh.
Kine ki seng nongrep ki la kynnoh ia ka sorkar jylla halor ka jingiamynjur bad ka National Hydropower Power Corporation (NHPC) na ka bynta ban pyntrei ia katei ka dam kaba radbah khlem da iamir jingmut lang bad ki nongshong shnong kiba dei ki trai shnong jong ka thain.
Na ka liang u president ka SIFF u Tasik Pangkam u la kdew ba ki nongshong shnong kiba dei na ka jaidbynriew Adi kiba don ha ka thain jong ka wah Siang kin ym mynjur da lei lei ruh ha kaba iadei bad kane ka projek bording namar kane kan buh ka jingma kaba khraw na ka bynta jong ki bad ba ki lah ruh ban duh noh iala ki jong ki jaka puta.
U Pangkam u la pyni nuksa ruh ha kaba iadei bad ki nongshong shnong kiba dei ki Chakma bad ki Hajong kiba la kylla sakma lyngba ka jingpyntrei ia ka Kaptai Hydroelectric Project ha ka thain kaba hap mynta hapoh Bangladesh ha ki snem 1960 kaba la pynlong ia ki ba kin hap ban wad jaka riehtngen ha India.
“Nalor ka jingduh noh ia ki shnong ki thaw kiba don sha ki jaka them bad pynkylla sakma ia ki trai shnong hapoh Arunachal Pradesh, kane ka projek kaba10,000 MW kan ktah ruh ia ka jylla Assam ba marjan ha kiba bun ki bynta. Ngi la ieng pyrshah halor ki jingthmu ban tei ia ki dam kiba radbah mynta lah 13 snem kynthih bad ngin ym pyndem da kaba suk,” ong u Pangkam.
