Itanagar, Jymmang 15: Ki paidbah nong shong shnong jong ka jylla Arunachal Pradesh kila pynlong da ka jingiakhih kaba jur ha ka sngi Palei pyrshah ia ka China halor ka jingthmu ban pynkylla kyrteng ia ki 27 tylli ki jaka kiba hap hapoh u pud u sam jong ka ri India.
Kane ka jingiakhih ki paidbah kadei mynta ka sngi ka 15 tarik u bnai Jymmang da kaba kila kaweh ia ka lama lai rong jong ka ri India ha ryngkat bad ka jingpyrta da ki slogan ha sor Hawai bad thang ruh ia ka dur jong u President ka China u Xi Jinping ban pynpaw ia ka jingpyrshah ka jong ki.
Kane ka jingïakhih ka la long kum ka jingkynthoh ïa kaei kaba ki nongïakhih ki la batai kum ka jingpyrshang be-aiñ bad khlem nongrim jong ka China ban kam trai halor ka jaka jong ka India.
“Kane kam dei ha u snem 1962, hynrei ka dei jong u snem 2025 bad ngi kyntait jur ia kane ka jingthmu ban pynkylla kyrteng jong ka China ïa ki 27 tylli ki jaka ha Arunachal Pradesh. Ngi dei ka bynta jong ka India bad ngin dang ïai long kumta. Ka Arunachal Pradesh kam shym la dei satia ka bynta jong ka China, bad ki jingdawa jong ki kam don hok satia,” ong u nongshong shnong ka thaiñ.
“Ka jingdawa jong ki, ka long kaba khlem nongrim. Kumno kin pynkylla kyrteng ïa ki jaka jong ngi? Ka Arunachal ka dei ka bynta ba kongsan jong ka India, bad kum ki nongshong shnong, ngi da sngew sarong ba ngi dei ki nong India bad lada khie ka thma ngi long kiba kloi ban ai ïa ka jubab kaba biang,” ong sa u wei na ki nongiakhih.
Ki nongshong shnong ki la kdew ruh ïa ka jaka kaba eh jong ka thaiñ, da kaba pynpaw ïa ka jingkloi ban pynkhreh ban kyrshan ïa ki shipai India lada donkam.
“Kam long kaba suk ban im ha kum kine ki jinglong jingman. Hynrei ngi long kiba la khreh na ka bynta kano kano ka jingjia bad ban ai jingkyrshan ïa ki shipai jong ngi,” ong uwei u nongïakhih.
Halor kane, ka Ministry of External Affairs kala pynmih ba ka pyrshah jur ia ka jingthmu ka China ban pynkylla kyrteng da kaba pyntikna ïa ka jingsynshar jong ka India halor ka Arunachal Pradesh.
