Itanagar, Naitung 29: Ki pulit ka jylla Arunachal Pradesh kila ioh ban kem ia ka kynhun tuh kali na kiwei pat ki jylla kiba trei kam hapoh ka nongbah Itanagar Capital Region, ha kaba kila ioh ban kurup haduh 57 tylli ki kali rem dor ba kynthup ia ki kali Audi, Ford Endeavour, bad ki kali Toyota Fortuner.
Haba bud ryntih katkum ka jingtip ba la ioh na ki tnad syntiat, ki Pulit ka Itanagar Capital kila registered da ka suo motu FIR (Ita PS Case 102/25 U/S 111(2)(b)(3)(4)(5), 317(4), 336(2), 340, 61(2) BNS) bad la thaw ruh ia ka Special Investigation Team (SIT) hapoh ka jingialam u SP Capital, u Jummar Basar.
U Superintendent of Police u Jummar Basar u la iathuh sha ki lad pathai khubor ba kila ioh ban kem haduh san ngut ki briew bad u la bynrap ruh ba mar mar ki dkhot ka SIT kila leh shitom ban wad ia ki kali tuh kiba la pynphriang lyngba ka kynhun ba la pynbeit ryntih ban khaii ia ki kali tuh na Delhi-NCR bad ki jylla ba marjan.
Kane ka kynhun tuh kali ne ki Gang kila pyndonkam da ki kot ki sla ba shu thok ban pynbiej ia ki nongthied ki bym bna ia kaei kaei ruh.
“Kane ka dei kawei na ki jingioh ban kurup ia ki kali kaba heh tam kaba ngi la iohi ha kane ka thain. Ka jingkem ia ki san ngut ki suba donkti ka pyni ia ka sienjam kaba kongsan ha kaba pynpra ia ka network. Ngi dang bteng ia ka jingtohkit bad ngi khmih lynti ba kin dang don shuh shuh ki jinglap ha ki sngi ban wan,” la ong u Basar.
U SP u la kyntu ruh ia ki paidbah ba kin long kiba husiar haba ki thied ia ki kali second-hand bad kida dei ruh ban pynshisha ia ki kot ki sla ba long trai.
Katkum ki Pulit, kane ka kynhun ka thew beit tang ia ki kali rem dor bad kiba heh na Delhi-NCR. Ia kineki kali la shalan ne pynpoi pat sha ka jylla Arunachal Pradesh bad hadien ba la dep ban pynkylla ia ki nombar engine bad chassis bad pynkhreh ruh ia ki kot ki sla kiba thok. Nangta sa die ia ki ha ka dor kaba duna ia ka dor jong ka iew.
“Ki kali tuh lane ki pisa ki lah ban don ka jingiadei lane thep pisa shabar jong ka ri India, la ka long lyngba ki digital money trails lane lyngba ka nongpyniaid ha ki thain khappud bad kane mynta ka dang don hapoh ka jingtohkit kaba bniah,” ong u Basar.
