Itanagar, Nohprah 23: Ki pulit ka nongbah Itanagar kila kem ia ar ngut ki briew kiba dei na Kupwara district jong ka Jammu and Kashmir halor ka jingkynnoh ba ki dei ki nongsyntiat bad lum ia ki jingtip na ka bynta ki briew ka Pakistan.
Kine ki briew kiba la shah kem ki dei kiba la tip kyrteng kum- Aijaz Ahmed Bhat bad u Bashir Ahmad Ganai.
Haba kren bad ki lad pathai khubor, u IGP (Law and Order) u Chukhu Apa u la ong, “la kem ia ki ha ka 18 tarik u Nohprah, bad ïa ki nongshah kynnoh la wanrah sha kane ka jylla na Kupwara district jong ka Jammu and Kashmir bad ki don mynta ha ka kti jong ki pulit hapoh custody. Da kane, ka jingshah kem baroh ha kane ka kam ka la kiew sha ka san ngut,”.
U la ong ba ki nongshah kynnoh ki lum ia ki jingtip na ki bynta bapher bapher jong ka Arunachal Pradesh bad ki iasam ia ki sha ki nongpyniaid jong ki na Pakistan.
“Ngi dang ap ia ka forensic report. Ka jingtohkit ba nyngkong ka la pynpaw ba ki sam ia ki jingtip ba kongsan bha sha ki nongpyniaid ha kylleng ka ri.Ka jingtohkit jong ngi ka dang iaid bad ki jingtip ba bniah yn sa paw hadien ka jingtohkit jong ngi,” u la ong.
Kham mynshwa, ha ka 21tarik Naiwieng, ki pulit ki la kem ia arngut ki riew ba kynthup ia u Nazir Ahmad Malik bad u Sabir Ahmed Mir bad baroh arngut ki dei ki nongshong shnong jong ka shnong Kupwara ha Jammu & Kashmir, hadien ba ki la ioh ia ki jingtip ba tikna halor ka jingdonkti jong ki ha ki kam syntiat. Hadien kane, ki pulit ki la kem biang sa uwei u briew uba la tip kyrteng kum u Shabir Ahmed Khan uba na Itanagar uba dei ruh na Kupwara.
“Ngi trei katkum ki jingtip kaba tikna shaphang kawei ka kynhun wad bniah kaba treikam shabar jong ka Arunachal. Hapoh ka jingïalam u SP ka Itanagar, u Jummar Basar, ka kynhun ka la trei shitom bad la kem ia kine ki briew.Ar ngut la kem na Kupwara bad lai ngut na ki jaka bapher bapher ha ka thaiñ jong ka nongbah Itanagar,” ong u Apa.
U la ong, “Ngin sa iaid shakhmat katkum ki sakhi ha ki sngi ban wan. Ki briew kiba la shah kem ki dei ki ba die blanket kiba la leit sha ki bynta bapher bapher jong ka jylla ban ioh lum jingtip,”.
“Nga la kyntu ia ki paidbah jong ka Itanagar ba kin da peit ia ki kot ki sla bad ka jingpynshisha na ki pulit shwa ban ailad ia ki ia uno uno u briew ha iing jong ki ban ai wai. Lada phim leh kumta te phin sa ngat ha ka jingeh,” u la ong.
