Dibrugarh, Nohprah 05 : Ka NSCN kala bsuhkhlieh biang ha Arunachal Pradesh bad sdang leh ia ki kam rahbor bad dawa pisa ha Tirap, Changlang bad Longding District jong ka Jylla.
Dang shen, ka NSCN (Ang Mai) kala rahbor ia arngut ki briew ba kynthup ia u Rangbah Shnong Chopkhu Gangsa bad u Khlieh Nongsynshar Shnong Chijgsan Wangham na ka shnong Chop kaba hap hapoh ka Wakka Circle jong ka Longding District. Kane ka jingjia kala jia ha ka 28 tarik u Naiwieng.
Kane ka kynhun kaikhlaw kala dawa pisa haduh T. 1.65 klur ban pyllait ia kine ki arngut. La iathuh ba ka kynhun ba 15 ngut ki riewkiengatiar kila rahbor ia kine ki arngut sha ka thain khappud bad ka Myanmar.
Kat kum ka jingiathuh ki trai shnong, ha ka 1 tarik Nohprah, ka shnong kala ioh ia artylli ki shihti ba la soi da u Col. Akham jong ka NSCN(AM) ba dawa pisa ban pyllait ia kine ki briew.
Kawei ka shithi kala dawa pisa T. 1 klur ban pyllait ia kine ki arngut katba kawei pat kala dawa T. 65 lak kum ka khajna kaba kine ki arngut kim shym la siew satia ha ka por ba ka kynhun kala dawa na ki lai bnai mynshuwa.
Ha kajuh ka por, u IGP (Law and Order) Chuku Apa ula don ha lynti ban leit sha Longding ban khmih ia ka jinglong jingman kaba don hapoh ka thain hadien ka jingjur ki kam rahbor jong ki kynhun kaikhlaw dang shen.
Une u Heh Pulit un lum ia ka jingialang bishar kam halor ka jingiaid ki kam khynra kaikhaw hapoh ka District.
