Dibrugarh, Jan 27: Ka NSCN/GPRN ka la kam ia ka jingkit khlieh halor ka jinghiar thma ia ka ktem jong ki shipai Assam Rifles ha ka shnong Ranglom kaba don ha Changlang district jong ka jylla Arunachal Pradesh ka ba la jia ha ka step sngi Nyngkong.
Ha ka kyrwoh khubor, katei ka kynhun ka la ong ba ki Naga Army Tactical Unit kila thmu ia ka ktem jong ki shipai ka4th Assam Rifles ha ka por 8 baje mynstep.Kala kam ruh ba hato la don ka jingmynsaw ne em namar ba ym lah ban pyntikna namar ba ki bor pahara kila khang dam ia katei ka jaka.Ka kynhun ka la batai ïa kane ka jingshah thombor kum ka “sienjam kaba donkam,” da kaba kynnoh ïa ki bor pahara jong ka India ba ki pynshitom beiñ ïa ki riew paidbah bad da kaba pynskhem ba kan bteng ïa ki kam ban “ïada ïa ka ri jong ki Naga.”
Kane ka jingshah hiar thma ka la jia ha ka por ba rakhe ia ka Republic Day.Ki tyllong khubor jong ki bor pahara ki iathuh ba ka ktem jong ki shipai Assam Rifles ha Ranglom, kaba don marjan bad khappud ka India–Myanmar bad kumba 10 km eiei na Changlang district, ka la shah hiar thma ha ka por kumba 8:45 baje mynstep.Kane ka jingshah hiar thma la ngeit ba ka dei ka jingia trei lang jong ki dkhot ka ULFA (Independent) bad ka NSCN (K-YA).
Ki shipai jong ka Assam Rifles ki la pynphai kylla pyrshah ia ki hadien katei ka jinghiar thma. Haduh mynta ym shym la don kano kano ka jingmynsaw.
Hadien jong kane ka jingjia, la nang pynkhlain shuh ia ka jingpahara ha kylleng ki jaka khappud, bad la pynlong ia ka jingkhynra lang (joint operation) ban lap ia ki nonghiar thma.
