Itanagar, Rymphang 02 : Ka Sela Tunnel Project kaba la pynwandur ban kyrda ia baroh ki bor ka mariang, ka ban pyniasoh sha Tawang ha Arunachal Pradesh, kan hap ban iaid shuwa ia ka safety audit jong ka kynhun ba lai shuwa ban plie paidbah ia ka.
Ia kane ka Tunnel yn sa plie da u Myntri Rangbah Duh ka Ri Narendra Modi hadien bala dep leh ia ka audit, kaba la khmih lynti ban pyndep ha ki pdeng taiew jong u Rymphang ban pyndep.
Kane ka tunnel kaba don marjan ka Sela Passs, ka dei kaba la pyntrei namar ka jingiai khang ia ka surok Balipara-Charidwar-Tawang ba hap ior bad jingtwa khyndew na ka jingjur u slap.
Kane ka project kan pynthikna ba ia ki lad pynisoh bym don jingthut sha Tawang kaba don marjan ka Line of Actual Control (LAC) bad ka China.
Ia kane ka project bala shna ha ka jingmang tyngka ba kot T.697 klur, kala mad ia ka jingpynslem ba bunsiem namar kiba bun ki daw kynthup ka khlam Covid-19.
Namar ka jingkhyllem ka Silkyara Tunnel ha Uttarakhand ha u snem bala lah, u DG ka BRO ula hukum ba dei ban leh audit biang ia ka jingshngain da ka kynhun manla kaba lai ia ka Sela Tunnel namar kane ka tunnel ka dei kaba kongsam bha ba ka don marjan ka Lince of Actual Control (LAC).
