Shillong, Risaw 16: U Myntri Rangbah ka jylla u Conrad K Sangma ula ong ba ka sorkar jylla kan sa leit ban iakren pynbeit pud bad ka sorkar Assam tang hadien ba ki Regional Committee ka jylla kila pyndep iala ka kamram bad aiti iaka kaiphod.
U Conrad ula iathuh ba ki Regional Committee ka jylla kila sdang iala ka kamram bad kila pynlong ruh ka jingialang ban iakren iaki sienjam kiba dei ban shim ha ka jingiakren pynbeit pud bad ka jylla Assam.
“Ka jingiasyllok jong ki Regional Committee ka jylla kila sdang bad kine ki Committee kin sa aiti iaka kaiphod sha ka sorkar khnang ba ka sorkar kan leh ia kaba donkam hashuwa ban iakren pat bad ka sorkar Assam ban pynbeit ia u pud u sam” la ong u Conrad Sangma.
Ula ong, ka sorkar jylla ka shaniah ha ki Regional Committee ban leh ia kaba donkam bad watla ka jingiakren pynbeit pud kam dei kaba suk hynrei ka sorkar kan wad iaki lad ki lynti kumno ban pynthikna ba baroh ki shnong bad ki jaka ha ki thaiñ khappud kin hap beit hapoh ka jylla Meghalaya.
Ula ong, ka sorkar jylla ha ryngkat bad ki Regional Committee shen kin sa iakren ruh bad ki Regional Committee ka sorkar Assam ban iaphylliew jingmut kumno ban iaid shakhmat haba iadei bad ka jingpynbeit pud haka wat ka ba-ar.
Kumban shu pynkynmaw haka 26 tarik u Nailur mynta u snem, ka sorkar jylla kala thaw ia ki 3 tylli ki Regional Committee ban khmih bniah ha kaba iadei bad ki 6 tylli ki jaka kiba don hapdeng ka jingiakajia pud bad ka jylla Assam.
Ia kitei ki Regional Committee la thaw na ka bynta ban khmih bniah iaka jinglong jingman jong ki 6 tylli ki jaka kiba don ka jingkajia pud kiba kynthup iaka Langpih ha West Khasi Hills District, ka Borduar, Nongwah Mawtamur, Deshdoomreah, Block-II kiba don ha Ri-Bhoi District bad ka Block-l, Psiar-Khanduli kiba ha West Jaintia Hills District.
Ia ka Regional Committee jongka Ri -Bhoi District yn khlieh da u Symbud Myntri Rangbah ka jylla u Bah Prestone Tynsong, ia ka Regional Committee jongka West Khasi Hills yn khlieh da u Myntri ka tnad PHE u Bah Renikton L.Tongkhar katba ia ka Regional Committee jongka West Jaintia Hills yn khlieh da u Myntri Kam Pynroi Sor u Bah Sniawbhalang Dhar.
Kitei ki Regional Committee kin hap ban iatreilang bad ki Regional Committee kiba la thaw da ka sorkar Assam bad kin khmih bniah bad pynshisha iaka kyrteng jong ki shnong ki thaw kiba la kam da ka Meghalaya bad ki kyrteng jong ki shnong kat kum ki rekod jongka sorkar Assam.
Ki Committee kidei ban aiti ia ki kaiphod sha ka Sorkar Meghalaya hapoh ka 45 sngi naduh ka sngi ba la pynmih ia katei ka jingpynbna paidbah ne Notification.
