Shillong, Nailar 28 : U Symbud Myntri Rangbah ba khmih ia ka kam pohiing Bah Prestone Tynsong ha ka sngi Balang ula pyntip ba ka Sorkar Jylla ka dang ap ia ka kaiphod kaba bniah na ki bor District hashuwa ban rai plie biang ia ka surok ha Them Iew Mawlong.
Ia kane ka kam la wanrah da u MLA ka VPP na North Shillong Bah Adelbert Nongrum hapoh ka Iingdorbar namar ki jingeh jong ka jingdheng kali kiba mih na ka jingkhang iaid kali na kane ka surok hadien ka jingkulmar kaba jia ha u 2018.
Haba jubab, u Bah Prestone ula ong ba ka Sorkar ruh ka don ia ka jingsngewkhia kumba la pynpaw da u dkhot ka Iing namar ka jingkhapngiah ki surok iaid kali kala long palat haba leit sha Motphran bad wat sha Iew Mawlong.
U pyntip ba dang shen ula pynlong ia ka jingialang halor kane ka kam.
“Kam dei tang ha ka Sorkar marwei ha kaban ong plie noh hynrei ngi donkam ruh ban peit ia ki jingai jingtip kiba bniah namar kane ka surok ka dei kaba don jingiadei bad ka jingthut ka shongsuk shongshngain” ong u Bah Prestone.
“Ngi la dep bthah ia ki bor District, SP bad tharai shen kin sa aiti ia ka kaiphod kaba bniah namar ngi kwah ban plie noh kham kloi iaka jaka rung sha kane ka surok “ ula ong.
Peit lang ia kane:
