Shillong, Nohprah 20 : Ka Sorkar Jylla ka dang ap ia ka All India Council for Technical Education ban ai jing mynjur ia ka Shillong Government College of Engineering ba kan sdang noh ia ka jingshim klas.
Haba pyntip ia kane hynne ka sngi Thohdieng, u Myntri ka Tnad Pule Puthi Rakkam A Sangma ula ong ba ka Tnad ka dang pynkhreh ban jubab ia ki jingkylli kiba la buh da ka AICTE.
“Shisien ba ngi la pyndep ia kane, ngin sa leit sha ka AICTE ba kan ai jingmynjur ha kaban sdang noh ia ka jing shimklas jong ka Engineering College” ula ong.
Kat kum ka jingong jong u, ki jingkylli kiba la AICTE kala buh ki dei eh halor ka jingpynwan dur ia ki kamra klas, ka jingdon ki kamra bad kiwei kiwei.
“Ngi dang leh ia ki kam ba donkam ban pynbiang ia ki jingdonkam haba iadei bad ki jingtei” ula bynrap.
Ka jingpyntrei ia ka academic block, ki hostel ia ki shynrang bad kynthei kila dep bad la plie paidbah ia ki da u Myntri Rangbah naduh ka 1 tarik Kyllalyngkot, 2023.
Ka Sorkar kala pynkha haduh 55 tylli ki kam nonghikai bad ki nongtrei na ka bynta kane ka college.
