Shillong, Jymmang 11: Ka Sorkar Jylla kala thoh sha u Myntri Rangbahduh ka ri Narendra Modi ban wan plie paidbah ïa ka Shillong Medical College, bad u Myntri ka tnat ka koit ka khiah Bah Wailadmiki Shylla u la ong ba ka Jylla ka kwah ïa ka jingplie noh iaka College mynta u snem namar ba la sdang ïa ki klas jong First Year MBBS.
“Ka dei ka jingangnud jong ki paidbah ka Meghalaya ban don la ka jong ka Medical College, ka dei ka jingjop kaba khraw ia ka jylla, kumta ngi kwah ba u Myntri Rangbah duh ka ri un plie noh ia ka” ong u bah Wailad.
U Myntri u la kdew ba ar tylli ki tarik la pynbeit mynshwa ban wan plie u Myntri Rangbahduh hynrei kim shym la urlong.
“Ha ki por ba la dep ruh, la pynbeit ar tylli ki tarik hynrei namar ki kam bym lah kiar um shym la lah ban wan” u la ong haba bynrap “Kumta, ha kane ka kynti ngi dang ap ba baroh ki elekshon kin kut noh bad ngin sa thoh biang sha u Myntri Rangbahduh”.
Watla iaka tarik yn sa pynbeit naka ophis jong u Myntri Rangbahduh, u Bah Wailad u la ong ba ka Meghalaya ka kwah ban plie noh iaka Medical College. “Ngi kwah ba dei ban leh kloi katba lah namar ki klas ki la sdang jong ka First Year MBBS” u la ong.
Ka National Medical Commission ka la mynjur ban sdang shwa 50 tylli ki seat MBBS haka por plie nyngkong iaka Medical College. “Ka Medical Council ka la wan bad peit katkum ka jingbit bad ka ai jingbit ïa ngi ban sdangs shwa 50 ngut ki samla pule”, u la ong.
Halor ka Tura Medical College, u bah Wailad u la ong ba ha kaba sdang ka Sorkar ka la jied ban iaid daka public-private partnership namar ka jingduna ki nonghikai.
“Wat ban ïoh ïa ki nonghikai na ka bynta 50 ngut ki samla pule ruh ka long kaba jynjar bha. Na ka bynta ka Tura ka long 150 ngut, dei na kata ka daw ba ngi la jied ban iaid da ka PPP” u la batai.
Hynrei ka jingsngew ka la kylla namar ba ka Shillong Medical College la sdang kum ka jaka jaka pule Sorkar. “Hadien ki briew ki la ïohi ba ka Shillong Medical College ka la sdang kum ka jaka pule Sorkar, ki kwah ruh ba ka Tura kan long ka Government Medical College” u la ong.
“Ngi la pyrshang ban pynshai hynrei ki briew ki dang kwah ia ka kum ka medical college jong ka Sorkar, kumba ngi ngeit ba ka dei na ka bynta ki paidbah, ngi la pyrkhat ba ngin pyrshang bad ngi la rai ba kan dei ka medical college jong ka Sorkar” ula ong.
Ka jingpynrung kam ka dang iaid shakhmat. “Ngi la pynmih advertisement na ka bynta ki nonghikai bad ki professor na ka bynta ka Tura Medical College”, u la ong. “Ka thong ka long ban pdiang ia ki samla pule naduh ka aiom pule ban wan, katkum ka jingpynrung kam nonghikai” u la bynrap.
Haba kren halor ki jingtei pynroi, u Myntri u la ong ba la dep ban pynbna katto katne tylli ki tender na ka bynta ka Shillong Medical College, kynthup ia ka madan ialehkai bad kiwei kiwei ki jingdonkam ba kyrkieh. “Ki don katto katne ki Tender kiba la pyllait namar ngi tip ba ka dei ka projek kaba heh, donkam shibun ki jingtei”, u la ong.
“Mardor ngi donkam ia ka Building kaba heh” u la ong bad bynrap ba ka tnat ka la khot ia ka expressions of interest ha u bnai ba la dep ban pynkhreh ia ka Detailed Project Report.
“U Myntri Rangbah ka Jylla u la pynthikna ia nga ban pyndep kloi katba lah ia ka DPR, lehse ngim lah ban leh shisien leh hynrei ngin leh haki wat (Phase) namar ngi donkam ia ki jingtei kiba heh” ong u bah Wailad.
