Shillong Lber 06: U Chief Electoral Officer ka jylla u BDR Tiwari ula ong, ba ka jylla Meghalaya kala long kaba la pynkhreh na ka bynta ban pynlong ia ka Elekshon MP Lok Sabha 2024 bad mynta ki ap sa tang ia ka Election Commission of India (ECI) ban pynbna ia ka tarik ban long ka elekshon.
U BDR Tiwari ula kren ia katei, ha ka sngi baar hadien ba ula dep lum ia ka jingialang bad ki Deputy Commissioner (DC) bad ki Superintendent of Police (SP) jong ki District bapher jong ka jylla Meghalaya, ha Conference Hall jong ka Secretariat, ha kaba iadei bad ka jingpynkhreh ia ka Elekshon MP Lok Sabha.
Ha ka jylla Meghalaya ia ka elekshon MP Lok Sabha yn pynlong ha ki Ar tylli ki Constituency, ka Shillong bad Tura Parliamentary Constituency.
U CEO ula iathuh ba ha katei ka jingialang ki heh jong ka Election Commission of India, kila iakren lyngba ka Vodeo Conferencing bad ki DC bad ki SP na ki district bapher na ka bynta ka jingpynkhreh ban pynlong ia ka elekshon MP Lok Sabha 2024.
“Ka jingpynsngew jong ki heh ophisar ka sorkar, ka long kaba biang bha bad ka jylla Meghalaya mynta, kala long kaba la pynkhreh ban pynlong ia ka Elekshon MP Lok Sabha” ong u Tiwari.
Ula iathuh, ba kiba ki kam ki jam kila iaid bha shakhmat bad kumta la khmih lynti ba ka jingpynlong ia ka elekshon kan long kaba iaid beit iaid ryntih bad la khmih lynti ba ki paidbah kin mih bun ban iashimbynta ha ka elekshon.
U Tiwari ula ong, ba ki ophisar kila ai ia ki jingbatai kiba bniah ha ki heh jong ka ECI halor ka jingpynkhreh iaka elekshon bad halor ka jinglong jingman jong ka suk ka saiñ ha ka jylla bad na ka liang ka ECI kala dap ia ka jingsngewtynnad halor ka jingpynkhreh baroh.
Ula ong ba ka Tnad Elekshon jong ka jylla myta ka ap sa tang ia ka jingpynbna jong ka ECI ban pynlong ia ka elekshon Lok Sabha.
 ban pynbna ia ka tarik ban long ka elekshon.){kind=link}