Shillong, Nailar 28: U Myntri ka tnat Jngohkai Bah Paul Lyngdoh ha ka sngi Palei, u la ong ba ka Khyndai Lad kan sa don ia ka dur kaba thymmai pura hadien ba la dep pyntrei ia ka project ban pynbha bad pynitynnad ia ka.
Haba kren shaki lad pathai khubor, u Bah Paul u la pynpaw ba ka Sorkar kala thmu ban wanrah ka jingkylla kaba heh bha iaka Khyndai Lad bad la dep ruh ban mang pisa.
“Ngi khmih lynti ia ka por hadien ka jingkut noh ka aiom lyiur ha kaba ngin sa lah shisha ban sdang ia ki kam ha Khyndai Lad bad phin sa iohi ia ka dur kaba thymmai ka Khyndailad” ong u Bah Paul.
U Bah Paul ula ong kane ka jaka kan don ïa ki jingpyn itynnad kiba bha tam, ki jingtem, ki jingpynthaba daki Light, ki jaka shongkai kiba iahap bad ka leit ka wan ki nongleit nongwan hapoh Khyndai lad.
U Myntri u la ong ba ki nongkhaii ha katei ka thain ki la ioh jingmyntoi na ka jingpynkynriah ia ki nongdie jingdie madan sha ki jaka ba la ithuh kyrpang daka Sorkar.
U la pynthikna ban shim khia bad ka Shillong Municipal Board (SMB) halor ki mat kiba thymmai kiba la mih dangshen khamtam iaka jingkynnoh ba don kiba iaid kali wat haka por bym shah ban iaid kali.
