Shillong, Jymmang 15 : U Myntri Rangbah ka Jylla Conrad K Sangma ula pyntip ba ka Sorkar shen kan sa pynbna ia ka ‘khubor ba bha’ ba iadei bad ka jingpynkhreh ban sdang noh ia ka jingtih dewiong kat kumka jingstad saian ha Meghalaya, hadien jong ka elekshon Lok Sabha.
Haba iakren bad ki lad pathai khubor hynne ka sngi Balang, u Conrad ula ong ba ki kam ki jam hapoh ka kyrdan jong ka Sorkar India kala dep lut bad mynta tang ka kam ba iadei bad ka jingiada ia ka mariang, ka dang sah hapoh ka Sorkar Jylla.
“Ngi khmih lynti ban gin sa lah ban iakren noh ia kane ka kam bad shen kumba nga ong ba ka shong satang daki sngi, hadien jong ka elekshon, ngin sa iapeit ba ngin lah ban ai ia ka khubor ba bha sha ki paidbah” ula ong haba bynrap “Hynrei, kumba nga ong, ngan ym shu kynthih lamwir namar kine ki dei ki kam ba dang iaid nyngkong eh ha Jylla, ngi lah ban don ki jingbakla kiba lah ban pynslem ia ka kam, ngam khmih lynti ia ki hynrei kumba nga ong ba ka dei ka sien nyngkong ba ngi ktah ia kane ka bynta, kumta kan ym long kaba suk. Hynrei ngi kyrmen ba ngin lah ban shim rai noh shen”.
Halor ki daw ka jingslem, u Conrad ula ong ba ka jinglong jingman ha Meghalaya ka dei kaba pher bha namar ka jingphylla ha ka riti bat khyndew. Ha ka por ba ka Iingkashari Supreme Court ka weng noh ia ka jingkhang tih dewiong bad pynbor ban tih da ka jingstad saian, ka Sorkar India kam don satia ia ki kyndon halor ka riti bat khyndew kumba long ha Meghalaya, ha kaba ia ki jaka la long trai da ki riew shimet ym ka Sorkar. Katba ha kiwei ki bynta ka ri, ka jaka ka dei jong ka Sorkar bad kino kino ki briew kiba kwah tih par, kin hap aplai bad shim wai na ka Sorkar ban tih par.
“Nab aka dang jia ha ka sien ba nyngkong eh, kala shim pork ham bun ia kaei kaba la khmih lynti. Kane ka dei ka daw kaba la pynlong ban slem ki kam ki jam hynrei ka bynta kaba eh duh ban thaw ia ki rukom treikam, ki kyndon bad ki Policy ban pyntreikam da ki nongtih par kila don lut mynta” ula ong.
Ha kajuh ka por, u Myntri Rangbah ula pdiang ia ka jingai jingmut jong ka Single Member Committee ka Iingkashari Meghalaya High Court bad ong b aka jingthaw ia ki lad kamai jakpoh da kiwei pat ki jait kam ia ki nongshongshnong ka Jylla kynthup ha ki District ba don kyrhai u dewiong, ka dei ka policy bad ka buit treikam jong kane ka Sorkar ha kine ki hynriew snem bala leit noh.
“Kumta kaei kaba ka Iingkashari ka ong ka dei kaba dei bad kane hi ka dei kaba ngi la leh. Ha kine ki san snem jong ka Sorkar MDA, ka dei ka thong jong ka Sorkar ban thaw ia ki lad kamai jakpoh bad kumta la sdang ia ki mishon bapher bapher kiba don mynta” ula ong.
U Conrad u pyntip ba da ki hajar ngut ki nongrep kila ioh jingmyntoi na ka mishon Lakadong bala pyntreikam da ka Sorkar Jylla khamtam ha ki jaka kiba don bun ki par dewiong.
U CM ula kren ruh halor kiwei pat ki mishon kumka Self Help Group Movement ha kaba la kynthup lang ia ki Kynthei bad la ai ka lad ba kin kamai jakpoh, ka prokram PRIME. CM Elevate bad kiwei kiwei.
