Shillong, Lber 15 : Ka Sorkar Jylla ka dang ap ia ka jubab na ka Ministry of Education ban pyllait ia ka Meghalaya na ka jingpynlong ia ka Common University Entrance Test (CUET).
“U Myntri Rangbah jong ngi ula iakynduh ia u Myntri ka Sorkar Pdeng bad kyrpad ban pyllait noh ia ka Meghalaya bad ngi dang ap mynta ia ka jubab na ka Ministry” ong u Rakkam A Sangma, Myntri ka Tnad Pule Puthi haba iakren bad ki nongthoh khubor.
Ha ka shithi bala phah sha u Myntri ka Sorkar Pdeng Dharmendra Pradhan ha ka 7 tarik Lber, u Myntri Rangbah Conrad Sangma ula ong “…namar ba bun ki college ha Jylla ki dei kiba iasoh bad ka North Eastern Hill University, nga kyrpad ia ka Ophis jong phi ban pyllait noh ia ka Jylla Meghalaya na ka jingpynlong ia ka CUET”.
“Ka Jylla Meghalaya dang shen kala pynlong ia ka elekshon MLA, ia kaba la pynbna result dang ha ka taiew bala lah. Kane kala lam sha ka jingslem ban pynlong ia ka State Board Examination bad halor kane, ki samla pule kila mad ia shibun ki jingeh ban iakhun ia ka CUET na ka bynta ki jaka pule Under Graduate hapoh ka Jylla” ula ong.
U Myntri Rangbah ula pyntip ruh ba ka Sorkar kala shim ruh ia ki sienjam ban pynkha iala ka jong ka State University. “..Ngin sa ioh shen ia ka jingmynjur na u Lat ka Jylla”.
Ha u bnai Jymmang, 2022, u Myntri ka pule puthi ka Sorkar Pdeng, ula mynjur ban pyllait ia ka Meghalaya na ka jingpyn long ia ka CUET kat kum ka jingkyrpad jong u Myntri Rangbah ka Jylla.
