Shillong, Kyllalyngkot 15: Ka sorkar jylla ka dang ap ia ka jingmynjur bad ka jingai jingbit jong ka Coal Ministry ban plie ia ki par dewiong na ka bynta ban ioh sdang noh ia ka jingtih dewiong katkum ka jingstad saian ne ka scientific mining ha ka jylla Meghalaya.
Haba pyntip ia kane ha ka sngi Balang, u Myntri Rangbah ka jylla Conrad K Sangma ula ong ba ka Public Hearing na ka bynta ban tih dewiong katkum ka jingstad saian ha ki lai tylli ki jaka, ka dei kaba lah dep pynlong ha ki ar bnai kiba la dep.
“Hadien katei, ia ki kot ki sla (file) la pynpoi biang sha ka tnad Forest bad sha ka Pollution Board ban ioh ia ki jingbit bad mynta kitei ki kot ki sla ki lah poi sha Delhi,” ula ong haba bynrap “Ka Coal Ministry ha Delhi mynta kan sa shim ia ka rai kaba khatduh ban ai iaka jingmynjur, hadien ba la khmih ia baroh ki jingai jingmynjur kaba la ai da ki tnad bapher jong ka sorkar pdeng bad ka sorkar jylla. Mynta ka jingai iaka rai kadei ka Coal Ministry ban plie ia ki par dewiong bad katei kadei ka jingai jingbit kaba khatduh kaba dei ban ai hadien ba ka Coal Ministry kala khmih bniah ha ki bynta baroh”.
Ula ong ba ka long kaba donkam ban sngewthuh ia ka jinglong jingman jong katei ka kam bad ban weng noh iaka (Ban) jingkhang pyrshah jong ka NGT.
Haba iadei bad ka jingsngewkhia ki Liang Pyrshah halor ka jingpynslem, u Myntri Rangbah ula ong, “Kila don ki jingsngewkhia kiba la pynpaw da ki riewshimet halor ka jingpynslem, hynrei kine kidei ki bynta kiba eh ia kaba donkam ban shimkhia ha ki kyrdan ki bapher bapher, la ka dei ka sorkar India, NGT, Supreme Court, Coal India ngi hap ban iakren bad kiba bun ki kynhun. Kumta ban shu peit nabar ka long kaba suk bha bad ong, kaei kaba jia, balei ki kam kim shym la iaid sted, hynrei ka long kaba kyllain bha bad shisien ba ngi lah pyndep ia kiei kiei baroh bad shisien ba ngi lah pynmih ia ki jingtip kiba bniah halor kaei kaba jia. Nga thikna ba ki paidah kin iaroh ia ka kam kaba ngi lah leh ban pynurlong noh ia katei ka sngi”.
