Guwahati, Naitung 06: Ka jingtuid ki nongjngohkai sha ka krem Lymput kaba don ha East Khasi Hills kala kylla long pat bad buh ha ka jingma ia ki mattah kiba thymmai, kiba la tip kum ki Bouchetcamaena Subdelibrata, ia kaba la lap najan katei ka krem.
Ki Saïantis na ka Ashoka Trust for Research in Ecology and the Environment (ATREE) bad Kamrup College, Chamata ha Assam kila lap ia ki mattah ‘Snail Bouchetcamaena Subdelibrata’ hajan ka Krem Lymput ha Meghalaya.
Ki Saïantis kiba don bynta ha kane ka kam wadbniah kiba kynthup ia u NA Aravind na ka ATREE bad u Nipu Kumar Das na ka Kamrup College.
Kitei ki mattah kidei kiba mih na ka longïing Camaenidae bad kidei kiba don ha ka dewbah South bad Southeast Asia.
Uwei u Shell ne jingsop ba tyrkhong jong ka mattah la lap najan ka Krem Lymput.
Ia kitei ki mattah la lap nyngkong ha ka shnong Habiang, Garo Hills bad South Sylhet Hills.
La lap ia katei, na kawei ka kynja sla kaba don ha khyndew hajan ka jaka kaba don ki maw, katba ia kiwei pat ki jait jingthaw kum ki Cyclophorus sp., Macrochlamys sp., bad kiwei kiwei la lap na katei ka jaka ha ka por ba dang pynlong ia ka jingwad bniah.
Katei ka jaka kaba lap ia kitei, ka don iaka Soil pH kaba long 8, Soil Moisture kaba long 1.5, Soil Temperature kaba long 20.1°C bad ka humidity kaba 67%, kaba pyni ba ki khamlah ban shong ha ka jaka kaba don ka Alkaline bad ka jaka kaba kham pyngngad.
Ka Krem Lymput kadei kawei na ki krem kaba pawnam na ka bynta ki nongjngohkai kiba wan sha Meghalaya. Ka don ia ka khyrdop kaba rit, kaba plie pat sha ka jaka kaba kongsan kaba iar haduh 1km bad ia kane ka khyrdop la khot ruh kum ka “Way to Heaven,” ne ka Lynti sha Bneng, ka long kaba syntuid bad kaba jynar ban iaid ne kam sha shilliang.
Nangne ka lam pat sha kiwei pat ki bynta jong ka krem kaba don ia ki maw kiba itynnad.
Kawei na ki bynta kaba kham khring bha iaki nongjngohkai hapoh kane ka krem, kadei ka ‘Mughal Room’ kaba iar haduh 25 meter ha ka pyngkiang bad ka jingjrong bad ka jingiar kane ka bynta ka long 75 meter. Kane ka krem baroh kawei ka jrong kumba 6,641 meter.
“Ka Krem Lymput kadei ka jaka kaba khring bha ia ki nongjngohkai ha Meghalaya. Nalor kane ha katei ka thaiñ, u kwai u mih bha, ki jaka sah bad kiwei kiwei ki kam kiba la leh da ki briew bad kine ki lah ban buh ha ka jingma kaba khraw ia kitei ki mattah” la ong u Saïantis jongka ATREE.
Kila don ruh sa artylli ki jait mattah kiba lap na kiwei pat ki jaka ha kaba ia u Bouchetcamaena Fusca ha ka sien kaba nyngkong eh la lap na Lushai Hills, Mizoram bad ha kawei pat ka liang ia u Bouchetcamaena Delibrata la lap na u Blue Mountain, Mizoram. Kine ki mattah kila sdang ruh ban saphriang ha ki bynta jong ka West Bengal, ha Khasi Hills jongka Meghalaya, Manipur bad South Sylhet Hills (Bangladesh).
Ki stad saïantis kila pynpaw ba kine ki jait jingthaw ki don hapdeng ka jingma kaba khraw naka jingpluh ki khlaw ki btap, ka jingpynjot bad jingpom ia ki dieng, ka jingpynjot iaki jaka shong jaka sah kine ki mattah bad kiwei kiwei ki daw, kiba lah ban pynduna syndon ia ka jingdon jong kitei ki mattah.
