Shillong, Jymmang 05 : Ka Nongbah Shillong kala iphngain bad kan sa kup ia ka dur thymmai ha ka thain Anjalee Point, da ka jingweng noh ia ka Anjalee Petrol Pump na ka thain.
Kane ka jingweng ia ka Anjalee Point ka dang shu sdang dang ha kine ki khyndiat sngi hadien ba ka Shillong Contonment Board (SCB), kala mynjur ban ai ia ka jaka sha ka Sorkar Jylla ba kan pyndonkam ha kaban pynheh surok bad ban shna ia ka Fly-Over.
Kat kum ka khubor ba iohlum, la iathuh ba kane ka jingmynjur kala wan jia ruh hadien ba ka Sorkar kala rai ban ai kylliang ia ka jaka jong ka Tnad Animal Husbandry & Veterinary kaba don ha 7mer Upper Shillong.
La ong ruh ba ka jaka ba ieng ka Anjalee Petrol Pump ka dei ka jaka jong ka Contonment Board, bala aiwai sha u trai ka Pump da ki phew phew snem mynshuwa.
Kumba long mynta, ka jingpynra/pynmadan ia kane ka petrol pump ha Anjalee Point kala iaid shaid shaid.
Lah ban kdew hangne ba ka FKJGP-Upper Shillong kala pyrshah jur ban pynkynriah ia ka Anjalee Petrol Pump sha ka jaka ka Sorkar ha Upper Shillong halor ka nongrim ba kane ka jaka ka Tnad Animal Husbandry ka dei kaba la mang ban kyntiew ia ki kam ri jingri bad pynmih dud na ka bynta ka jingmyntoi ka Jylla.
Haba jubab ia kane, u Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong ula ong ba kam don satia kano kano ka jingktah ban ai shi lynkhot ka jaka Sorkar sha ki trai ka Anjalee Petrol Pump namar ka jingpynkynriah ia ka Pump na Anjalee Point ka lah ban pynduna ia ka jingdheng kali.
“Ngi la shim ia ka rai ban kyrpad ia u trai ka petrol pump ban pynynriah namar ka jaka hiar jong ka Flyover bala tyrwa kan long ha ka jaka ba don ka pump. Lada ngim ioh ia kane ka jaka, kan long kaba eh ban ioh lain ha kaban shna ia ka flyover” ula ong.
Kat kum ka jingong jong u, kane ka flyover kan iarap shibun ban pyllait ia ki paidbah na ki jingsahkut ha ka dheng kali ha ki thain Upper Shillong haduh Civil Hospital, kaba ju shimpor haduh 2-3 kynta ban lait.
Haba pynpaw ba ka jaka jong ka tnad Animal Husbandry ka don kumba 60 acre, ula ong ba ka petrol pump ha Upper Shillong kan donkam tang 12000-13000 sq ft ka jaka.
, kala mynjur ban ai ia ka jaka sha ka Sorkar Jylla ba kan pyndonkam ha kaban pynheh surok bad ban shna ia ka Fly-Over.){kind=link}