Shillong Nailar 26: Ka President jong ka Khasi Jaintia Deficit School Teachers Association (KJDSTA) ka Kong Susan Syiem kala ong, ba ka seng KJDSTA ka dei ka seng kaba ieng ym tang ban dawa iaka hok jong ki nonghikai hynrei ban kyntiew nyngkong eh iaka pule puthi ha ka jylla khamtam ha kaban ai ka jinghikai kaba janai pura iaki khynnah.
Haba iakren bad ki nongthoh khubor shabar jong ka Annual General Meeting ba long hynne ka sngi Ha Don Bosco Hall, Laitumkhrah, I Kong Susan ila ong “Ka Seng ka angnud bha ban kyntiew ia ka pule puthi ha Jylla ban pyniahap kyrdan bad kiwei pat ki Jylla ka Ri. Ki Nonghikai ba thymmai ka Seng kila shimkhia bha ia kane ka bynta”.
Haba pynpaw ba ka por ka dawa ia ki Nonghikai ba kim dei shuh ban hikai da ka rukom kaba 30=35 snem mynshuwa, ine I Nongialam ka KJDSTA ila ong “ Ngi donkam ban pyntbit ialade bad ki kor ki bor ka juk mynta. Ka juk Technology kala iaid mynta bad kan pynsuk bha ia ki Khynnah ruh ba kin ioh ia ki jinghikai ia kaei kaba ki pule”.
Da ki spah ngut ki Nonghikai na Ri-lum Khasi bad Jaintia kila wan iashimbynta ha kane ka jingialang bah jong ka KJDSTA bad kila iatai halor ki mat bapher bapher kiba ktah ia ki Nonghikai skul bad kumjuh ban kyntiew ia ka rukom ai jinghikai ia ki Khynnah.
“Ngi la iakren halor ki mat jingdawa kiba ka Sorkar ka dang pynsahteng kiba kynthup ia ka 50% Revised Pay Arrea, ka DCRG kaba la bthah da ka 5th Pay Commission ban pynkiew noh n aka 3 lak shiteng sha ka 10 lak, ka ACPS bad kiwei kiwei” ila iathuh.
Halor ka bai bam tynmen jong ki Nonghikai kiba la trei ia ka kam shuwa u snem 2010, I kong Susan ila pyntip ba ka KJDSTA ka dang iai buddien ia kane ka kam bad kan ialeh ruh ban pynioh ia ki da ka National Pension scheme ka bym pat shym la pyntreikam satia da ka sorkar.
Ka KJDSTA ryngkat ka JAC kala shim ruh ia ka rai ba kin ym pynlong satia ia kino kino ki jingiakhih ban dawa iala ka jong ka hok.
I kong Susan ila ong “Ka jingdawa jong ngi ia ka hok kan dang iai bteng hynrei kan long beit da ka jingiakren sngewthuh bad ka Sorkar Jylla”.
“Lyngba ka jingiakren bad ka Sorkar, kila don katto katne ki mat jingdawa kiba la treikam bad ki dang don ruh kiba sahteng. Ngin iai buddien mynta ia kiba sahteng” ila ong.
