Nongpoh, Risaw 31 : Ka Jingiaseng Samla ka Mynnar Presbytery, Ri-Bhoi District, ka don ia ka jingangnud ban tei ia ka Youth Centre hapoh ka thain-ka ban khring ia ki samla ba kin pynmylliem ialade ha ki kam kiba tei ia ka imlang sahlang bad ba kin lait na ki jingshah ialam bakla bad ki jingsniew ba ha rukom.
Ka Jingiaseng Samla ka Mynnar Presbytery kala iohi ia ka jingma kiba ap ia ki samla ka thain na ki jingsniew jong ka pyrthei bad da kane ka Youth Centre, ka Jingiaseng Samla ka thmu ban pynlong kum ka jaka ai jinghikai bapher bapher ia ki samla nalor ban pynlong ruh ia ki Music Class ia ki samla kiba don ka sap.
Ban kynjoh sha kane ka thong, ka Jingiaseng Samla Mynnar Presbytery kala shim ia ki sienjam ban pynmih pisa da kaba pynlong ia ki prokram bapher bapher ba kynthup ia ka iew die ia ki mar ba shna hi, ki jingialehkai phutbol paralok bad ka Musical Evening kaba la pynlong hapoh ka Jirang Govt Hr Secondary School.
La plie pyrda ia kane ka prokram da u Bah R. Sutnga, kum u kongsan ha ka jingïadonlang u Tbn E. R Rani, Tbn. P Nongrum, Moderator presbytery, Pastor B. D Kurbah lem bad kiwei kiwei ki nongïalam jong ka Balang. La pynhap pyrda ia kane ka prokram da u Bah Sosthenes Sohtun MLA ka Jirang Constituency ha ka jingiadonlang u Bah Victor Rani, MDC Jirang lem bad kiwei kiwei.
Ki nongkren ha kane ka prokram ki la ai ia ka jingiaroh ia ka sienjam jong ka Jingiaseng Samla, kiba la iohi jngai halor ka jingdonkam ban khring ia ki samla ka dong ka thain sha ki kam ba bha ha ka imlang ka sahlang bad ba kin kiar pat na ki jingmlien kiba sniew kiba la ker sawdong khamtam ka jingnang roi jong u drok bad kiwei kiwei.
