Shillong, Risaw 31 : Ka Deputy Commissioner ka East Khasi Hills Kong RM Kurbah kala byrngem ban leh da kaba tyngeh pyrshah ia ka jingpynieng ia ki check gate/toll gate ba khlem ioh jingbit bad ban lum pisa be-ain na ki kali kiba iaid ha ki surok National Highway, State Highway bad ki surok heh ba don hapoh ka District.
“Kano kano ka jingialeh pyrshah/pynkhein, yn leh da kaba tyngeh kat kum ki kyndon Ain” ong ka kyrwoh na ka Deputy Commissioner.
Kane ka hukum kala mih ruh tang shisngi hadien ba ki Pulit ka Laitumkhrah Police Station, kila kem ia uwei u Nongialam ka seng Hynniewtrep National Youth Front (HNYF), uba donkti ban lum pisa be-ain na ki trok kit mar, ba kin ioh iaid n aka jingkieng Damsite, Umiam.
Une u Nongialam ka HNYF u dei u Bless Dkhar uba bat kum u President ka HNYF ka East Khasi Hills District.
Kat kum ka kyrwoh ka DC kala ong “ Ka Ophis kala ioh ia ki jingujor, khubor bad ki jingud jingnam pyrshah ia ka jingpynieng ia ki khyrdop be-ain ha ki surok National Highway, State Highway bad surok heh jong ka District”.
Kala pyntip ba ka Sorkar Jylla kala ieng ha ka nongrim kaba skhem ba kan ym nym map satia (zero tolerance) halor ka jingmih ki khyrdop be-ain lane ka jinglum pisa beain na ki kali kiba iaid ha ki surok ba don ha East Khasi Hills.
Kala ong ba ka jingpynieng ia kine ki khyrdop be-ain bad ki jingker ban lum pisa jubor na ki kali, kala pynthut ia ka jingiaid beit jong ki kali bad pynthut ruh ia ka iaid ka ieng jong ki riew paidbah nalor ka jingbuh ia ka jingma ba lah ban mih ki jingjia takhuh kali.
Namar kiei kiei, ka ong ba ka Ophis ka khang pyrshah ban pynieng ia kine ki khyrdop ba khlem ioh jingbit lane kano kano ka jinglum pisa jubor na ki kali ba iaid ha ki surok hapoh ka District.
