Shillong, Risaw 31: Ka Synjuk ki Rangbah Shnong ka Ri Bhoi District, kala dawa na ka Sorkar Jylla ba ka dei ban pynduna noh iaka dor bai register ia ki jaka ki puta ha Ri Bhoi District namar ka jingrem palat ka bai rejistar kala buh ha ka jingeh ia ki paidbah khamtam ha ki thain khappud kiba la phaikhmat pynban sha Assam.
Ka Synjuk kala buh ia kane ka jingdawa hakhmat u Myntri ka tnad Revenue Bah Kyrmen Shylla ha kaba kala aiti ruh da ka dorkhas ba ka sorkar kaba dawa ia ka Sorkar ba ka dei ban shimkhia mardor.
Haba iakren bad ki nongthoh khubor, u Bah PB Sylliang ula ong, “Haba ngi leit sha DC ophis ban rejistar ia ki jaka ki puta ki jong ngi, ka dor kala poi sha bneng sha khyndew, I jaka iba ngi thied T.2 Lak, ka bai rejistar pat ka poi sha ka T.2,50,000 ne T.3 Lak…ka rem da ka bai register ia ka bai jaka”.
Ula pyntip ba u Myntri Sorkar ula pynpaw ba yn sa rah ia kane ka mat sha ka jingialang jongka kynhun Myntri na ka bynta ban buh ia ka dor kaba biang khamtam ia ki trai ri trai muluk kiba don ia ka jaka ka puta.
U Bah Sylliang ula ong, kiba bun ki jaka ha Ri Bhoi ki dei kiba shu ioh pateng na ki kmie ki kpa bad ter ter hynrei ban rejistar ia ki jaka hap ban lut da ki phew lak.
“Kiba bun ki nongshong shnong ha khappud kim leit shuh ban rejistar ia ki jaka ki jong ki hapoh ka DC Office Ri Bhoi namar ba la rem palat ka bai rejistar bad kiba bun ki briew ki la leit ban rejistar ia ki jaka jong sha Assam namar ba ka Assam ka ai ei bad kim donkam ban siew eiei ia ka bai rejistar jaka” ula pyntip.
“ Ngi la pynsngew ha u Myntri Sorkar ba lada long kaba lah, ka Sorkar jylla kan pyllait noh ne ban kin shim noh ha ka dor kaba rit khnang ba kan pynshlur ia ki trai jaka ha khappud ban rejistar ia ki jaka jong ki hapoh DC Office, Ri Bhoi” ong u Bah Sylliang.
