Shillong, Jylliew 27: Ka Nongaiktien jong ka Sorkar Jylla ka Kong Ampareen Lyngdoh, hynne ka sngi Baar, kala ong, ba ka Search Committee kan ioh iala ka jong ka por ban pyndep iaka jingwad ia ki riewshemphang kiban shah thung kum ki dkhot jong ka Expert Committee kaban khmih bniah iaka Reservation Policy jong ka jylla.
“Ngi dang don haka lynti ban wad ia ki dkhot kiba kloi ban khlieh ne ban long ki dkhot haka Committee. Ki kam ki jam kila iaid shakhmat bad ngi donkam ban ai por iaka search committee khnang haba ngi leh ia kano kano ka kam kan long ha ka lynti kaba dei bad kaba biang” ong ka Kong Ampareen haba iakren bad ki nongthoh khubor.
Kala ong ba ka sorkar kam kwah ban shu leh kyrkieh ia kane ka kam namar ba katei ka mat ka long kaba khia bha.
“Ngi hap ban long kiba peitngor bad ngin ia ap watla ngi sngewthuh ba ka don ka jingpynbor hynrei ngin ym leh kyrkieh ia kano kano ka kam kaba khia bha kaba don ia kiba bun ki bynta kiba iadei bad ka aiñ ka kanun bad ngim kwah ban kren eiei kaban long kaba bakla hakum kane ka por kaba mynta” ong ka Kong Ampareen.
Kala ong ba iaka jinglong dkhot haka expert committee yn pynshong nongrim bha ia ki jingkylli bad ki jingpynshai kiba la wanrah da ki kynhun ki bapher ha kaba iadei bad ka reservation policy.
“Shisien ba la lah ban pynshai ia ki jingkylli bad pynsngewthuh iaki paidbah ha kaba iadei bad ki jingkylli, kumta ngin sa peit iaka jinglong dkhot ha ka expert committee, namar kum ki dkhot jong ka expert committee kin hap ban jubab ia ki jingkylli bad ia ka ishu kaba mih, kiba dei ki jingkylli kiba la buh da ki kynhun bapher bad ki riewshimet ha ka imlang sahlang” ong ka Nongaiktien jong ka sorkar.
Ha kaba iadei bad ka jinhgkynnoh ki sengsain pyrthei bad ki sengbhalang ba ka Office Memorandum kaba thymmai halor ka Reservation Roster kaba la pynmih haka 14 tarik u Jylliew kadei kaba dap da ki jingklumar bad kam long kaba shai kdar ba ia ka Roster yn pyntreikam naduh mynshwa ne nangne shakhmat, ka Kong Ampareen kala ong ha kaba iadei bad ka jingpyntreikam iaka Roster la dep ban buh ia kawei ka committee.
“Ka KHNAM kala phah ia kawei ka shithi, nga lah dep pynshai biang ba ki don ki bynta jong ka jingpynwan ia ki kyntien kiba la pyndonkam da ka sorkar ha ka jingpynbna ka lah ban ym long kaba iahap bad ki katto katne ki kyntien kaba ki kwah ia ngi ban gin pyndonkam” ong ka Kong Ampareen.
Hynrei ha ka jinglong jingman, ha ka jingthoh bad jingle, ka Roster kan ai jingshakri ha kaban pyntreikam iaka ka rukom leh kaba la iaid mynta ha ka jylla Meghalaya naduh u snem 1972. Ka jinglong jingman bad ka jingleh kan dei kaba bud ryntih kumba la ju leh bad ki seng sain pyrthei ki lah ban phah ia ki kino kino ki jingsngew ki jongki halor kitei ki jingle.
Ka Kong Ampareen kaba long ruh ka Myntri Sorkar kala iathuh baka Committee jong ki seng sain pyrthei halor ka Roster kan sa shim ia ka rai la kin dang bteng ban pynlong iaka jingialang.
“Ngim pat shim ia kano kano ka rai halor katei. Ngi dang ap ia baroh ki seng sain pyrthei ba kin phah ia ki jingpynsngew ki jongki” ong ka Kong Ampareen bad ka ong, ba haduh mynta ka Committee kam shym la ioh ban lum ia ka jingialang namar kiba bun ki seng sain pyrthei kim shym la aiti ia kino kino ki jingthoh hynrei tang kawei ka seng sain pyrthei kala phah iaka jingthoh ha kaba iadei bad ka jingpyndonkam ia kawei ka kyntien haka Roster.
Ha kaba iadei bad ka jingdawa kiwei pat ki riewlum kiba don hapoh ka jylla ban bhah lem ia ki 15% ha ka Job Reservation, ka Myntri Sorkar kala ong, “Ngi lah iakynduh ban ia kren ia kane ka kam bad u Myntri Rangbah, ha kaba kiwei pat ki riewlum ka jylla ha ka taiew bala dep bad ngi la pynpaw ha ki ba kidei ban phah da ki jingthoh baroh iaka jingsngew bad iaka jinglap ka jongki.
