Shillong, Jylliew 27 : U MLA barim ka Mawlai Constituency Bah P.T Sawkmie, u la pynpaw ia ka jingbynniaw kaba jur halor ka jingthmu ban pynsangeh treikam noh ia ki 200 ngut ki nurse ha NEIGRIHMS Hospital.
U Bah Process ula ong ba lada kine ki 200 ngut kin duhkam, ka mut da ki hajar ki longiing longsem kin shah ktah khamtam ia kito kiba wan na ki longing kiba duk bad kiba don ruh ia ki khun ki kti.
Lah ban kdew hangne ba kine ki nurse ba shah weng kam ki dei jong kawei ka Agency ba shimwai ban pynbiang ia ki nurse ha NEIGRIHMS hospital mynta la bun bun snem.
U bah P. T Sawkmie u la kyntu ia ki Agency ba kan pynsngew ia kane ka kam sha u Director ka NEIGRIHMS ba un pynneh biang ia kine ki nurse ha ka kam.
U la ong ba kine ki arspah ngut ki nurse ki dei kiba la don jingshemphang bha ha ka kam bad lada yn pynsangeh noh ia ki, kan sa don ka jingktah kaba khraw ia ka jingsumar ha kane ka hospital ka Sorkar pdeng.
Une u MLA barim ula kyrpad ruh ia u Director ka NEIGRIHMS ban pyrkhat biang sa shisien shuwa ban weng ia kine ki nurse.
Pule lang ia kane: Mynjur ka Sorkar ban pynkylla ia ka Meghalaya District Court Ministerial Service, 2020
