Shillong, Jylliew 27: Ka Sorkar Jylla hynne ka sngi Ba-ar, kala mynjur ban pynkylla thymmai noh ia ki kyndon jong ka Meghalaya District Courts Ministerial Service, 2020, kaban pynthikna ba ki kam ha ki District Court kim dei satia kiba lah ban pynkynriah.
Ia kane ka rai la shim da ka jingialang jong ka Kynhun Myntru kaba la pyniaid da u Myntri Rangbah ka Jylla Conrad K Sangma.
Haba iakren bad ki nongthoh khubor, ka Nongaiktien ka Sorkar bad Myntri Sorkar Kong Ampareen Lyngdoh kala ong ba da kane ka jingpynkylla, ki District Council kin ioh bor ban pyndam noh ia ka rule 33 bad nangne shakhmat, ki Distrrict Selection Committee (DSC) Rules kin treikam ha ki District Court ha ka jingthungkam thugnjam bad ba kan nym don shuh ka jingpynkynriah kam.
“Ia kane ka Rules la pynkylla thymmai mynta ka sngi. Ngi la weng noh ia ka rule 33 bad nangne shakhmat, ka Meghalaya District Courts Ministerial Service Rules kan pynthikna ba ki kam ki dei shuh kiba lah ban pynkynriah” ong ka kong Ampareen.
Ka Myntri ka pyntip ruh ba ka Kynhun Myntri kala mynjur ruh ia ka jingtyrwa ban nang aibor ha ka liang ka jingpyndonkam ia ka pla tyngka sha ki DGP, IGP, DIGP bad SP hapoh ka Schedule IV jong ka Meghalaya Delegation of Financial Power Rule, 2006.
Nalor kane, ka kong Ampareen ka pyntip ruh ba ka Kynhun Myntri kala ioh ruh ia ka jingbatai kaba sani bha na ka Tnad Urban halor ki plan bad programme ki ban sa pyntreikam bad mynta ki jingpyn khreh kila iaid shaid shaid ban pynjanai ia ka iaid ka ieng ha kylleng ki jaka ka Jylla.
“Ngin sa sdang ia ki project ba thymmai ha Meghalaya. Katto katne ki kam ki dei kiba la dep ban tyrwa. Ka jingbatai ka long tang ban pynsngewthuh ia ka Kynhun Myntri hynrei ki don shibun ki kam kiba lah dep iakren. Kine ki kam ki dei halor ka jingkhapngiah ki surok, ka jingpynjanai ia ka rukom sam um ha Shillong, ka skywalk, ki leisure park kum ki Childrens Park bad kiwei kiwei” kala ong haba bynrap “Kan sa don biang ka jingialang ha kaban ngin sa ai ki jingbatai ba khatduh ia kine ki plan”.
Pule ruh: Manipur: Leit jngoh u CM ia ki lanot thma iapher Jaidbynriew ha Khuman Lampak Sport Complex
