Shillong, Nailar 12: U Myntri Rangbahduh ka ri u Narendra Modi ha ka sngi U Blei, ula aiti kyrpang ia ki 109 tylli ki jait jingthung bapher bapher kiba tei ia ka met sha ka ri baroh kawei, kaba kynthup ia ar tylli ki jait jingthung ba la pynmih da ka Indian Council of Agricultural Research, North Eastern Hill region (ICAR-NEH).
Ka ICAR-NEH ka la pynmih ia ka Poorvottar Perilla 1 bad ka Poorvottar Perilla 2 (Nei lieh ha ka ktien Khasi) kaba la ithuh ha ka ri bad mynta la aiti na ka bynta ka ri baroh kawei.
Ia kine ki jait jingthung la pyllait bad ai jingithuh ha ka jingialang kaba 92 jong ka Central Sub-Committee on Crop Standard Notification and Variety Release for Agricultural Crops, kaba la long ha New Delhi ha ka 2 tarik u Nailar.
Ki ar jait ki jingthung kiba la pynwandur da ka ICAR-NEH ki long kiba bit bha na ka bynta ki jaka lum kiba ioh slap bha ha ki thain shatei lammihngi kiba kynthup ia ka Meghalaya, Mizoram, Nagaland, Arunachal Pradesh, Sikkim bad Tripura bad ka thain shatei lam mihngi jong ka jylla Uttarakhand bad Himachal Pradesh.
Kine ki jait jingthung ki lah ban pynmih soh haduh 12-14 kwintal ha ka shi hektar bad ka por ban san ne heh ka long 160-165 sngi. Kine ki jingthung ki long kiba lah ban kyrda bad ki don ia ka umphniang kaba 39-43 percent bad ka Protein kaba 18-19 percent.
Ki long kiba myntoi shibun ha ka kam ai dawai namar kilah ban ialeh pyrshah ia ka jingpang sniehdoh, jingpang kpoh, ban pyniap ia ki khniang bad kiwei kiwei.
U Director ka ICAR-NEH Region, u Vinay Kumar Mishra, ula ai khublei ia ki stad wadbniah bad ula ong ba ka dei ka por kaba sngew sarong ia kane ka jaka pule kaba la pawnam ha ka ri baroh kawei na ka bynta ban kyntiew ia ka rep ka riang ha ka thain shatei lam mihngi jong ka ri.
.){kind=link}