Shillong, Iaiong 01: Ka Khasi Students Union (KSU) ha ka sngi Baar kala aiti ia ki shiphew tylli ki mat jingdawa ban pynthikna ba ka hok jong ki trai riewlum kam dei ban shah knieh ha ka thungkam thungjam hapoh ka North Eastern Indira Gandhi Regional Institute of Health and Medical Sciences (NEIGRIHMS).
Ha ka shithi kaba la phah ha u Director jongka NEIGRIHMS, u Chairman jong ka Employment Cell ka KSU u Reuben Najiar ula ong, “Ka Union ka kyrpad da kaba sngewrit ban shimkhia lem mardor ha kaba iadei bad katei ka bynta ban pynbeit bad ban shim ia ki sienjam ban peit ba ka hok jong ki trai riewlum jong ka jylla ym dei ban pynkhein bad ban bat ia ka kyrdan jong ka jingai jingsumar hapoh jong ka NEIGRIHMS kaba la hiar na ka rukom thepkam kaba la dep, da kaba pynrung da ki Nurse kiba la tam kyntait.
“Ka Union kala kyntu ba ia katei ka jingpynbna ne Advertisement ban buh shwa sharud tad haduh ban da dep shimkhia bad pynbeit noh ia katei ka kam. Namar kano kano ka jingleh bym suidniew ia katei ka jingkyrpad kan pynlong ia ka Union ban shim da kiwei pat ki sienjam kiba tyngeh” ula byrngem.
Kala kyntu ia ka NEIGRIHMS ba kan shimkhia ia kitei ki 10 tylli ki mat jingdawa bad ka KSU kala ong, ba ia ka jingbuh kyndon ia ka rta dei ban pynneh haduh 35 snem ym da ka 30 snem ka rta kaba dei kaba la pynjlan na ka bynta kiba hap ha ka Reserved Category.
“Katkum ka advertisement kala paw ba ka rta na ka bynta ka kam Nursing Officer bad kiwei pat ki Post la pynhiar noh sha ka 30 snem bad ia ka rta na ka bynta ka kam Pharmacist la pynhiar sha ka 27 snem. Ha ki kam thungkam kiba la dep ka jingbuh kyndon ia ka rta kadei 35 snem bad kynsan kynsan la pynhiar sha ka 30 snem bad kane kala ktah jur bha ia ki samla kiba don iaka jingangnud. Ka jingshim rai ki bor kiba dei khmih ha kaba iade bad katei ka bynta, ka long kaba bakla shibun bad ka bym don jingmut namar ka jingbuh kyndon da ka rta kaba rit kan ktah jur ia rukom treikam baroh kawei, kan ktah ruh ia ka ioh ka kot, kan pynduna ia ka jingshemphang bad jingtbit jong ki nongtrei kaba long kaba donkam bha na ka bynta ka jingtreikam kaba janai ha ka liang ka jingai jingsumar” la ong u
Najiar bad ka bynrap “Ka jingpynkylla ia ki kyndon jong ka Recruitment Rules ban pynrit iaka rta sha ka 30 snem, dei ban pynduh pyndam noh bad dei ban buh biang da kyndon kaba 35 snem ka rta ryngkat bad kiwei kiwei ki jingpynjlan na ka bynta ki Reserved category.”
Kala banjur ruh ba dei ban don ia ka Ratio kaba 20:80 ki shynrang bad kynthei ha ka Nursing Officer, ong u Najiar bad ka pynpaw ba ka jingthep kam ha ka Nursing Officer kaba la leh ha u snem 2023 lyngba ka NORCET kadei ka jingbakla kaba khraw na ka liang jong ki bor pyniaid jong ka NEIGRIHMS. Ha u 2023 la shem ba ki 194 ngut kiba la shah jied ki kynthup haduh 175 ngut ki Nurse shynrang bad tang 19 ngut ki Nurse kynthei kiba la shah jied. Kitei ki 175 ngut ki Nurse shynrang kidei kiba la tam kyntait ‘leftovers’ ki bym shim la shah jied ha kiwei pat ki jaka sumar bad la pynrung pat ia ki hapoh ka NEIGRIHMS bad kane baroh kadei namar ba ki bor pyniaid kim dei kiba iohi jngai ha kaba iadei bad ka jingbhah lang na ka bynta ki kynthei bad shynrang kaba dei ban long ha ka Ratio 20:80.
“Ka jingpynrung kam kaba la leh ha utei u snem kadei kaba la leh da ka NORCET hynrei ka AIIMS kala don iaka Ratio jong ki shynrang kynthei kaba 20:80 kaba la pynlong ia ki ban ioh da ki kyrtong kiba bha tam. Kitei ki Nurse Shynrang kiba bun hi kidei kiba na Rajasthan ki bym shim la don satia ia kano kano ka jingshemphang ha ka kam bad kila long pynban kum kiba wanrah ia ka jingthud ha ka jingai jingshakri ha ka liang ka koit ka khiah. Kila don bun ki jingujor kiba ym lah niew shuh kaba ka Union kala ioh pdiang pyrshah ia kitei ki Nurse shynrang ki bym nang ban trei ia ka kam bad kila long ruh ka jingma ia ka jingim jong ki nongpang. Lada kiwei pat ki jaka sumar ki lah ban don ia ka Ratio kaba 20:80 kumta kaei kaba khanglad ia ka NEIGRIHMS ban leh lang kumtei” ula bynrap.
Nalor kane, ka KSU kala dawa ba jingpan ia ka “Experience Certificate” tang na ki hospital kiba 50 jingthiah dei ban weng noh hynrei dei ban pdiang tang ia ka “Experience Certificate” na ki hospital kiba la ioh ia ka jingithuh, ka jingpynrung kam dei ban pynlong da ka offline mode (OMR), dei ban khmih bniah ia ka Roster Register bad ban pynbit pynbiang katkum ka jingbhah kaba dei ban bhah bad kadei ban don ruh ia ka jingkdew kaba shai dar ia ka ‘Backlog Vacancy’ bad sa katno snem ka dang sah ban pynrung kam na ka bynta ki kam kiba lait thylli ki bym pat dep thung bad kumta dei ban nym bhah shuh hynrei dei ban mang noh sha kiwei pat.
Ka KSU kala dawa ruh ba iaka bhah jong ki OBC dei ban pynduh noh ha ka Group B & C namar ha Meghalaya kam don satia ka thup OBC, ka jingbhah ia ka Scheduled Caste ha ka Group B must dei ban khate noh da 1% kumba la bhah ha ka Group C da kaba pynshong nongrim katkum ka jingbun paid, ka jingbhah ia ki OBC kaba 27% ha ka Group B bad 5% ha ka Group C dei ban pynphai noh sha ki Scheduled Tribe jong ka jylla Meghalaya (Khasi/ Jaintia/ Garo) bad ka jingpynrung kam ha u snem ba la dep ruh ka donkam ban shah khmih bniah biang da kaba pynshong nongrim halor ki daw kiba la kdew haneng bad dei ban shim mardor ia ki sienjam.
 ha ka sngi Baar kala aiti ia ki shiphew tylli ki mat jingdawa ban pynthikna ba ka hok jong ki trai riewlum kam dei ban shah knieh ha ka thungkam thungjam hapoh ka North Eastern Indira Gandhi Regional Institute of Health and Medical Sciences (NEIGRIHMS).){kind=link}