Shillong, Naiwieng 10: Ka seng Hynniewtrep Youth Council (HYC) hynne ka sngi kala ai por shi taiew iaka sorkar ban pynpoi iaka song pisa jong ka Scholarship shaki Bank Account jong ki samla pule lym kumta kin pynlong ka jingiakhih ba tyngeh.
Hynne ka sngi ki dkhot ka seng HYC bad ki samla pule na ki kolej bapher bapher kila pynpaw ba katba ki samla pule kim pat ioh pdiang iaka jingpyntip (Message) naki Bank ba la rung pisa ha ki Account, kim ngeit satia ba ka sorkar ka la pyllait iaka bai bam lane ka Scholarship.
Watla ka sorkar jylla ka la pyllait iaka Scholarship jong u snem 2021-2022, hynrei naka liang ka seng HYC ka la lum ka jingialang jong ki khynnah bad samla pule ha kylleng ka jylla ha jan ka Shillong Law College, Dhanketi ban pynpaw ba ki samla pule kim lah ban shu ngeit ba la pyllait iaka pisa kat bym pat ioh pdiang iaka song pisa ha ki Bank Account.
Naka liang u General Secretary ka HYC samla Roykupar Synrem u la ong ba ka seng ka don ryngkat bad ki samla pule kum shi bynta ban kyntiew iaka pule puthi hapoh ka jylla.
U Roykupar u la ong ba ka Meghalaya ka la wan ba khatduh haka liang ka pule puthi bad naka liang ka sorkar haka jaka ban iarap iaki samla pule bad ban pynshlur ba kin bteng iaka pule jong ki hynrei ka pynslem pynban ban pyllait iaka song pisa lane ka Scholarship.
“Ka sorkar pdeng kala pyllait iaka song pisa jong ka Scholarship naduh u snem 2021 sha ka jylla hynrei ka sorkar Meghalaya ka la bat sah ia kane ka song pisa haduh 9 tarik Naiwieng 2022” ula ong.
Une u Nongialam ka HYC ula pyntip ba ki la don katto katne ki khynnah bad samla pule kiba la hap pep skul noh namar ka sorkar jylla kam pyllait iaka scholarship naduh 2021 bad naka liang ka seng kan ai por shi taiew lym kumta kan bteng biang iaka jingiakhih.
U Education Secretary ka HYC samla Enlang Sawian u la kynnoh ba ka seng kam ngeit shuh iaka sorkar namar man ka por kala shu thok bad pynbeij iaki paidbah bad mynta sa iaki samla pule.
