Shillong, Iaiong 09: Ka Awaken India Movement (AIM) hynne ka sngi Balang, ka la ai por 7 sngi iaka Sorkar Jylla ba kan sangeh noh ban pynbor ia ki briew ban pynrung kyrteng Aadhaar.
Ia kane ka rai la shim hadien ka jingiakhih kaba la pynlong hakhmat u mot jong u Kiang Nangbah ha Barik point hapdeng ka jingsyrtap ki bor pahara.
Hadien ka jingialang ka la mih ruh ka jingiapyni bor hapdeng ki pulit bad ki nongialam ka AIM namar kila thmu ban iaid paidbah sha Secretariat.
Kane ka jingia pyni bor hapdeng ki Pulit bad ki nongialam ka AIM ka la wanrah ïa ka jingdheng kali kaba jur bha ha Barik Point ha kaba ki kali ki la sahkut hajuh namar ki paidbah bad ki nongialam ka AIM ki ieng hapdeng ka surokbah.
La iohi ruh ba katto katne ngut ki nongialam ka AIM ki la shah tan hapoh ka kali pulit hynrei la pyllait noh ia ki hadien ka jingwan tuklar jong u MLA ka VPP uba la shah Sospon, u Bah Adelbert Nongrum uba la iadon bynta lang ruh ha ka jingiakhih jong ka AIM.
Hadien katto katne por ba la iakren bad ki Bor District la ailad ia ki nongialam jong ka AIM ba kin iakynduh ia ka deputy commissioner (DC) ka East Khasi Hills District ka Kong RM Kurbah ban aiti ia ka Dorkhas halor Aadhaar.
Haba kren shaki lad pathai khubor u president ka AIM u Bah Banshai Marbaniang u la iathuh ba ka deputy commissioner ka la pynthikna ia ka kynhun ba kan phah mardor ia ka Dorkhas sha u Myntri Rangbah ka Jylla u Conrad K Sangma na ka bynta ban leh iaka kaba donkam.
U Bah Banshai u la pynshai ba ka AIM kam pyrshah ïa ka jingpynrung kyrteng Aadhaar hynrei ka pyrshah ïa ka jingpyrshang jong ka Sorkar ban pynbor ïa ki briew ban pynrung kyrteng Aadhaar hapoh ka Jylla.
Haba kren ia ka rai jong ka Supreme Court, u Bah Marbaniang u la ong “Ka (hukum ka Kashari) ka la kdew shai ba ha ki Jylla khamtam ka Meghalaya, Assam bad Jammu & Kashmir, u Aadhaar um dei uba donkam. Namarkata, ai ba ki briew kin rai lada ki kwah ne em ban pynrung kyrteng Aadhaar”.
U President ka AIM u la kynthoh ïa ka Sorkar ba ka la byrngem ban pynsangeh ïa ki jingmyntoi sha ki briew kiba kynthup ïa ki samla pule, ki ASHA, ki nongtrei Anganwadi, ki nongbat job card ka MGNREGS, ki nongïoh penshon lada kim don ïa u Aadhaar.
“Halor kane, ngi la rai ban ai por 7 sngi ia ka Sorkar Jylla ban pynbeit ia kane bad lada kam lah ngin leit ujor shaka High Court ne Supreme Court ban ioh iaka hok” u la ong.
 hynne ka sngi Balang, ka la ai por 7 sngi iaka Sorkar Jylla ba kan sangeh noh ban pynbor ia ki briew ban pynrung kyrteng Aadhaar.){kind=link}