Shillong, Naitung 18 : Ki nonghikai Contractual ha ki skul Lower Primary jong ka sorkar hapoh ka lama jong ka Meghalaya Government LP Schools Contractual Teachers Association ha ka sngi Nyngkong ki la ai por ar taiew ia ka sorkar ba kan khot ia kren noh ia ki halor ka jingshah wengkam hashwa ba kin shim da kiwei pat ki sienjam ba kham tyngeh.
“Lada ka sorkar kam jubab ha kine ki artaiew ngim banse ban ialam lang ia ki khun ki kti ban leit shah thngan ha Ïing jong u Myntri Rangbah ka Jylla,” ong u nongialam ka kynhun Bah Birbor Riangtem haba kren bad ki lad pathai khubor
ha Shillong Press Club.
Utei u nonghikai u la iathuh ruh ba ki don palat hajar ngut ki nonghikai kiba la shah weng kam noh ha u 2020 bad haduh mynta ki dang ap khmih lynti ia ka jingisynei jong ka sorkar ban thung kam biang.
Haba jubab halor ka jingkylli, u Babu Birbor u la ong “Ki phah leh MTET iangi kumno kein ha ka rta kaba 43 snem ngin dang hap ban ialeh ia katei ka eksam ban bteng ia ka kam.”
U ong ruh ba katei ka jingweng kam kynsan jong ka sorkar ka la ktah bad shim syndon wat ia ka jingim jong iwei i nonghikai ba don jingthut ha ka dkhot met na ka daw ka jingnangjur jong ka jingkhuslai.
Kumta, na ka liang kitei ki nonghikai ki la ong ruh ba ki da khmih lynti ba ka sorkar kan phah bteng biang ia ka kam hikai ia ki khnang ba ki khun jong ki ruh kin ioh ban leit skul bad ioh ka bam ka dih kum kiwei pat.
