SHILLONG, Risaw 31: Ki nongshet ja hapoh ka shatri jong ka All Jaintia Midday Meal Workers bad ka All Meghalaya Midday Meal Workers hynne ka sngi kila ai por iaka sorkar jylla haduh 10 tarik Naiweing ban pynurlong iaka jingdawa lym kumta kin sdang ka jingiakhih khlem buh por.
Ki nongshet ja ha ki skul na kylleng ka jylla mynta ka sngi kila pynlong ka jingialang paidbah ha Madan Iewrynghep ban dawa naka sorkar ban kyntiew iaka bai nongsngi naka T. 100 shaka T. 2000 man u bnai naka pla tyngka ka sorkar jylla.
Haba kren ha kane ka jingialang paidbah u adviser jong ka All Midday Meal Workers u bah K. L Pariat ula iathuh ba ki nong shet ja ha ki skul mynta la lai bnai ki khlem pat ioh iaka bai nong bad kane ka buh jingeh iaki watla ka bai nong ruh kadei ka ba rit.
“Ki nong shet ja ki dawa ban kyntiew noh iaka bai nong shaka T. 2000 bad kumjuh ruh ban pynbiang ka tyndong lyer shet jingshet lane LPG bad ka um bam” la ong u bah Pariat.
U bah Pariat ula ong ba ki nongshet ja ha ki skul ha kylleng ka jylla ki ioh tang T. 100 man u bnai naka sorkar jylla bad kane kam iahap satia bad ka juk mynta bad dei namar kane ki dawa ban kyntiew noh iaka bai nong shaka T. 2000.
Ula iathuh ba ka jingshim rai ban ai por haduh 10 tarik Naiwieng iaka sorkar ban pynurlong iaka jingdawa ki nongshet ja kadei namar ki bor sorkar kila pyntip sha ki, ba ia kine ki jingdawa baroh yn iakren hapoh ka jingialang ka kynhun myntri sorkar.
