Shillong, Risaw 16: Ki nongtrei ASHA kiba don hapoh ka shatri jong ka Meghalaya Asha Workers Union (MAWU) hynne ka sngi kila aipor iaka sorkar 7 sngi ban pynurlong iaki jingdawa lym kumta kin mih paidbah ban pynlong ka jingiakhih.
Haba kren sha ki lad pathai khubor ka President jong ka MAWU Kong June Myrsing kala ong ba ka Union jan man ka por kala pynsngew shaka tnat ka koit ka khiah ban kyntiew iaka jingsiew bad ban ai ka jingsumar kaba ym donkam siew pisa iaki nongtrei ASHA hapoh ka skhim MHIS hynrei haduh mynta ka sorkar kam pat shim ia kano kano ka sienjam ban pynurlong ia kine ki jingdawa.
Ka Kong June kala iathuh ba naka por shak por ki nongtrei ASHA kila pynsngew shaka tnat ka koit ka khiah ba ki nongtrei kim lah shuh ban trei tang daka jingsiew kaba rit kaba T.2000 namar kane ka buh jingeh iaki ASHA ban pyndap pynbiang iaki jingdonkam hala ki ïing ki sem.
“Watla kien kidei ki jingdawa bala slem bha hynrei haduh mynta ka Myntri ka tnat ka koit ka khiah kam pat lah ban pynthikna ba ka tnat ka lah ne em ban kyntiew iaka bai nong ki ASHA” la ong ka Kong June.
Ka Kong June kala iathuh ba naka liang ka Myntri ka tnat ka koit ka khiah kala phah wan biang iaki ASHA hadien 10 sngi ka jingiakynduh ba nyngkong kaba dei mynta ka 16 tarik Risaw hynrei kaba lyngoh ka long baka Myntri kala pyntip shaki ba kam lait mynta ka sngi.
Kala ong ruh ba ka jingdawa kadei ban thaw iaka Grievances Committee ban khmih haba aidei bad ka jignshah wengkam ne shah pynkynriah ki nongtrei ASHA hynrei haduh mynta ruh ka tnat ka koit ka khiah kam pat shim ia kano kano ka sienjam ban thaw iaka Grievances Committee.
“Ka Myntri ka tnat ka koit ka khiah kala kular ban thaw daka Grievances Committee ban khmih iaka bha ka miat ki nongtrei ASHA hynrei haduh mynta kane ka jingkular ruh kala shu sah tang ka jingkular namar haduh mynta ki dang don ki ASHA kiba shah weng ne shah pynkynriah na kawei ka CHC ne PHC sha kawei pat” kala ong.
