Imphal, Risaw 16 : Ka Central Bureau of Investigation (CBI) hynne ka sngi Nyngkong, kala file ia ka chargesheet pyrshah ia ki hynriew ngut ki briew kiba donkti ha kaban pyniaid lyngkhuit ia ki arngut ki Kynthei ha Manipur, kaba la jia hapdeng ka thma iapher Jaidbynriew kaba khie ha ka 3 tarik Jymmang.
Ka CBI kala ai ruh ia ka kaiphod halor uwei u Khynnah uba pynkhein ain (child in conflict with law). Ia kane ka chargesheet bad kaiphod la ai hapoh ka Iingkashari Special Judge, ka Iingkashari CBI ha Guwahati.
Ka CBI kala register ia kane ka case halor ka jingkyrpad ka Sorkar Manipur bad ka jingpynbna na ka Sorkar India ba kan shimti ia ka jingtohkit halor ka video kaba la saphriang, kaba pyni ia ka jingshah pyniaid lyngkhuid ki arngut ki kynthei.
Kane ka jingjia kala jia ha ka 4 tarik Jymmang, 2023, ha kaba ki briew kiba don kumba 900-1000 ngut kiba la kieng atiar kila rung ha ka shnong B. Phainom kaba don ha Kangpokpi District ka Manipur bad kila pyniaid lyngkhuit ia kine ki kynthei.
La ong ba ha kane ka jinghiar thma, kine ki briew kila pynjot pynjulor bad wiang ding ia ka Iing, tuh ia ki tiar ki tar, shoh bad pyniap ia ki nongshongshnong nalor ka jingjrong kti ia ki kynthei. La kynnoh ba ha kane ka jingjia, kine ki briew kila bat ia arngut ki kynthei bad pyniaid lyngkhuit hadien ba kila pyniap ia arngut ki bahaiing jong kawei na kine ki kynthei.
Ha ka jingtohkit ka CBI, la lap ba kine ki hynriew ngut ki briew ki dei kiba donkti ha kane ka kam bymman.
Ka jingtohkit mynta ka dang iaid shakhmat ban lah pynithuh sa ia kiwei pat ki briew kiba donkti lang ha kane ka kam bymman nalor ka jingtohkit ia kiwei ki kam jong kane ka case.
Pule lang ia kane: Sdang ka NEIGRIHMS ia ka 4-D Radiation Therapy ban sumar iaka jingpang Bampong
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
