Shillong, Iaiong 08 : Ka Iingkashari Meghalaya High Court ha ka sngi Ba-ar, kala bthah ia ka Sorkar Jylla ba kan pynioh ia ki jingbit kiba donkam hapoh ka saw taiew na ka bynta ban shna ia ki saw tylli ki jaka thang briew da ka bording elektrik.
Ha ka hukum bala pynmih hadien ba shong bishar ia ka PIL, ka Iingkashari ba kynthup ia u Chief Justice IP Mukerji bad u Justice W Diengdoh kala ong “Haba phai sha ki project ba thymmai, la bthah ia ka Sorkar ban pynioh ia ki jingbit ba donkam hapoh ka saw taiew naduh kane ka sngi. Ki bor ba dei ai jingbit ki dei ban leh noh mardor ia ka kam. Ka dei ruh ban pynpaw ia ka jingiaid jong ka project ha ka dur jong ka kaiphod ha ka sien shong bishar ban wan jong kane ka PIL”.
Ia kane la pynmih hadien ba u Additional Advocate General ha ka kaiphod ba aiti sha ka Iingkashari ha ka 27 tarik Lber, ula jer kyrteng ki katto katne ki project ba heh ban shim da ka Sorkar ha kaban pyntrei ia ki jaka thang briew da ka bording elektrik ha New Shillong Township ha ka jinglut ba T.5.53 klur, ha Tura ha ka jinglut ba T.4.69 klur, ha Jowai ha ka jinglut ba T.5.16 klur bad ha Nongpoh ha ka jinglut ba T.4.9 klur.
Halor ki kam ba la iaid haduh mynta, ka kaiphod kala ong ba ka tnad ba dei khmih kaba dep ban ai ia ka jingmynjur hynrei dang donkam shuh sa ia kiwei ki jingbit na kiwei ki bor kum ka Meghalaya State Pollution Control Board. Ka por bala buh ban pyndep ia ka kam ka long 24 bnai naduh ka por bala mang ia ka.
Na kane ka kaiphod, la shai ba ka por ba kine ki jaka thang briew kin treikam ka dang long ka bym pat lah pynthikna.
Hynrei, ka kaiphod kala pynpaw ruh ia ki project bala dep pyntrei kata ka jaka thang briew kat kum ka jingstad saian jong ka Seng Khasi ha Syllei-Iawkein, Nongstoin, Khlieh Tyrshi, Jowai bad Jhalupara, Shillong.
Ha kajuh ka por, ka Iingkashari kala bthah ruh ia u Amicus Curiae ban pynlong ia ka jingialang bad ki District Magistrate bad ki nongmihkhmat ki jaidbynriew Khasi-Jaintia bad ki Hindu khnang ba kin pynkohnguh ba kin iapyndonkam lang ia kine ki jaka thang briew kat kum ki kyndon ban sa buh da ki District Magistrate kiban sa iasyllok bad u Amicus Curiae. La ong ba u Amicus Curiae un ai ia ka kaiphod kaba bniah sha kane ka Iingkashari ha ka sien shong bishar ban wan.
Ka Iingkashari kala buh ban shong bishar biang ia kane ka mukotduma ha ka 8 tarik u Jymmang.
