Shillong, Iaiong 08 : U Myntri Rangbah ka Jylla Conrad K Sangma ha ka sngi Ba-ar ula ong ba ka Sorkar kala kynshew pisa ha ki kor technology ban iakhun pyrshah ia ka Cyber Crime kaba la nang kiew hapoh ka Jylla.
“Ngi lah sdang ia shibun ki kam bad shibun ka pisa la kynshew ha kane ka kam. Ngi la nang pynbun ia ki briew ba trei, kynshew ha ki kor technology bad ngi la thaw ia ki Cyber Cell ha ki District bapher bapher” ong u Conrad haba iakren bad ki nongthoh khubor.
“Kumta, kila don shibun ki kam kiba la iaid bad dang don bun ki ban dang pyntrei. Wat ha ka jingialang ba dang shu dep khatduh, ngi la iakren ia kiba bun ki bynta bad ki Pulit kila nang pan shuh shuh ia ki briew bad kham bun ka jingkynshew pisa” ula bynrap.
