Shillong, Nohprah 3: Namar ka jingleh bym suindiew ka sorkar Jylla halor ka jingkyntur pud ka Sorkar Assam, ka Hynniewtrep Achik National Movement (HANM) ha ka sngi Saitjain, ka la aipor 10 sngi ia u Chairman ka Regional Committee ka Ri-bhoi district bynta ban tuklar ba kyntur pud Assam ha ki jaka khappud.
Haba kren sha ki lad pathai khubor, u Secretary ka HANM Bah Kyllang S Thongni ula “Haka jingialang jong ka Central Executive Meeting (CEC), la shim ia ka rai ban dawa na ka Sorkar Jylla lyngba u Chairman ka Regional Committee ka Ri-bhoi district ba kadei ban tuklar ia ka jingkyntur pud ka sorkar Assam da kaba shna beain ia ka surok ha Bakhlapara kaba dang hap hapoh ka Ri-bhoi district”.
U Bah Kyllang ula ong ba u Chairman ka Regional Committee ka Ri-bhoi district udei ban tuklar bad ban pynsahngeh mardor ia ka jingtei beain jong ka sorkar Assam hapoh u pud u sam ka jylla hapoh 10 sngi lym kumta ka seng kan shim da kiwei ki lad ki lynti.
U bah Thongni u la ong ba na ka por sha ka por , la iohi ba ka sorkar Assam ka ju pyrshang ban kyntur pud na khappud Ri-bhoi district hynrei haduh mynta ka sorkar jylla kam shym la leh eiei na bynta ban khanglad ia kane ka jingkyntur jong ka Assam.
U la ong ba ka seng ha kine ki sngi ba wan kan sa pynlong ia ka jingialang bad ki khlieh nongsynshar jong ka Hima Nongspung na bynta ban iakren bad ka jingkyntur pud ka sorkar Assam ha Ri-bhoi district.
