Shillong, Naitung 10 : Ka Kynhun Myntri ka Sorkar Jylla ha ka sngi Balang kala ai jingmynjur ia ka jingtyrwa ban ailad ia ki petrol pump ba kin siew da ka installment ia baroh ka khajna ba ki pynsahteng ban siew kaba kot haduh T.38 klur.
Haba pyntip ia kane hadien ka jingialang, u Myntri Rangbah ka Jylla Conrad K Sangma ula ong “Ki don ki petrol pump kiba khlem siew ia ki khajna ba la dei ban siew bad namar ki jingduna pisa jong ki, ka sut kala nang kiew”.
Ula ong “Kumta, khnang ban iaid lait ia kane ka jingeh ka ban nym lah ban pynbeit shuh hadien habud, ngi lah wanrah da kawei ka prokram ban pynbeit ia ka jingsiew bad ki petrol pump ha kaba ngin pynkein noh ia ka jingkhein sut bad ka khajna ba ki dei ban siew ruh kan neh beit kumjuh bad hadien ngin sa phiah ha ka dur jong ka instalment ba kin lah ban siew khuid noh”.
“Hynrei ka jingthmu hi ka long ba ngin buh hakhmat jong ki petrol pump ia ki lad ki lynti ba kumno kin lah ban siew noh ia ka jaka kaba ki dei ban siew, kaba kot ia jan T.35 klur lem bad ka sut kaba kot T. 3 klur” ula ong.
