Shillong, Nailar 11: Ka Iingkashari Chief Judicial Magistrate ka West Garo Hills, kala aibor hynriew sngi ia ki Pulit ban set ia u Vice President ka BJP bad MDC ka GHADC Bernard N Marak hapoh ka Police Custody ban ioh tohkit bniah halor ka jingioh kurup tiar pynbthei naka Rimpu Bagan, ka farmhouse ba u long trai.
Ka Iingkashari kala pynmih ia kane ka hukum haba bishar ia une u MDC ka BJP hynne ka sngi palei kat kum ka Tura Police Station case no. 166(07)2022 bala pynngat hapoh ka kyndon 109/ 110/ 120/ 120B/ 121/ 121A IPC pule lang bad ka kyndon 4/5 jong ka Explosive Substances Act, 1908.
Kane ka Iingkashari hynnin ka sngi Balang haba pynmih ia ka hukum ban set 14 sngi ia une u MDC hapoh ka Judicial Custody haba iadei bad ka kam khaii met hapoh ka Rimpu Bagan, kala aibor ia ki Pulit ban kem biang ia une u MDC halor ka jingioh kurup tian pynbthei na kane ka jaka jong u.
Ki Pulit ka West Garo Hills ha ka jingkhynra ia ka Rimpu Bagan ba long trai da une u MDC, kila ioh ban kurup ia bun bah ki tiar pynbthei, ki ryntih bad ki khnam nalor kiwei kiwei ki tiar pynmynsaw.
