Shillong, Nailar 10: Ka Iingkashari Chief Judicial Magistrate ka West Garo Hills, hynne ka sngi Balang, kala aibor sa ia ki Pulit ka Tura Police Station ban leit kem ia u MDC ka BJP Bernard N Marak na phatok halor ka case kurup tiar pynbthei na ka farmhouse jong u-ka Rimpu Bagan kaba don ha Edenbari.
Ka Iingkashari kala aibor ia kane halor ka jingkyrpad u Investigation Officer ka Tura Police Station, ban ioh tohkit ia une u MDC ka BJP halor ka Tura PS Case No. 166(07)2022 bala pynngat hapoh ka kyndon 109/ 110/ 120/ 120B/ 121/ 121A IPC pule lang bad ka kyndon 4/5 jong ka Explosive Substances Act, 1908.
Ki Pulit ka West Garo Hills ha ka jingkhynra ia ka Rimpu Bagan ba long trai da une u MDC, kila ioh ban kurup ia bun bah ki tiar pynbthei, ki ryntih bad ki khnam nalor kiwei kiwei ki tiar pynmynsaw.
Kat kum ka khubor, ki Pulit kin leit kem mynta ka miet ia u Bernard napoh ka phatok bad ban ialam tian bishar ia u lashai ka sngi.
Ka Iingkashari u Chief Judicial Magistrate, haba shong bishar biang hynne ka sngi ia ka Tura Women Police Case No 105(07), kala phah ia u Bernard N Marak sha ka Judicial Custody ba 14 sngi.
Ka Tura Women Police Station kala pynngat ia u Bernard Marak hapoh ka kyndon 370(3) IPC ba pule lang bad ka kyndon 3/4/5/6/7 jong ka Immoral Traffic (Prevention) Act, 1956.
Kane ka case jong ka Tura Women Police Station ka iadei bad ka jingioh kyndang ia ka kam khaii met hapoh Rimpu Bagan, kala lam sha ka jingkem ia u Bernard lem bad 73 ngut kiwei pat ki briew bad ruh ka jingioh pyllait ia 6 ngut ki Khynnah kiba shah set jubor ha kane ka jaka une u MDC.
