Nongpoh, Risaw 22: Kawei ka Longiing baduk kala ioh pdiang iaka jingkyrkhu ba na sha lyndet da ka jingioh ia ka Iing ba paka na ka Synjuk ka Seng ki Rangbah Katholic, kiba la pynshna bad ai sngew ia kane ka iing bala tei ha ka jinglut kaba kot T 4 lak tam.
Kane ka Longiing ka dei jong u Bah Suresh Syngkli bad I Kong Edit Bay kiba dei n aka shnong Nongkhrah, Ri-Bhoi District.
La sakhi ia kane ka jingaiti ia ka Iing ba paka sha kane ka Longiing da u Bah Sosthenes Sohtun MLA Jirang, u Bah Victor Rani MDC Jirang, Father Peter Syiemlieh SDB Parish Priest Nongpoh Parish bad ki dkhot jong ka Synjuk.
Haba kren sha ki nongthoh khubor, u Bah William Mynsong, President Synjuk ki Seng Rangbah Balang Kathilik Zone 6 u la ong ba ka jingshakri kam dei ban long tang ha kiba kynja mynsiem hynrei dei ruh ban shakri na ka bynta ka imlang ka sahlang.
U la pynpaw ruh, ba kane ka jingaiti ïa ka ïing ka long kum shibynta ban kner ki kti ban ai ka jingshakri sha ka imlang ka sahlang, namar kane ka longïing ka long shisha ka longïing kaba duk bad kaba donhok ban ïoh ïa ka ïing kaba bha.
Shuh shuh u la ong ba na ka liang ka Synjuk ki ju pynshna ïa ka iing bad aiti pat sha ki longïing kiba duk man ba pynlong ïa ka Annual meet bad kane ka dei ka sien kaba 7 jong ka Annual meet ha kaba ki la ïoh ban aiti ïa ka ïing kaba paka sha ki longïing kiba dei hok ban ïoh.
Na ka liang u bah Suresh Syngkli u ba la ïoh pdiang ïa ka ïing kaba paka, u la iathuh ba u la poi ban shongkha ha katei ka shnong naduh u snem 2013 ba u la don 3 ngut ki khun kiba dang rit ha kaba kum ka longïing hi pynpaw ïa ka jingkmen ban ïoh pdiang ïa kane ka ïing kaba kham bha bad u la pynpaw ïa ka jingsngewnguh ruh ïa ki nongïalam ka Synjuk ki Rangbah ka Balang Catholic kiba phaikhmat ïa ki jingeh jong ka longïing hi baroh kawei.
