Shillong, Jylliew 27 : U Myntri kam ialehkai ka Jylla Bah Shakliar Warjri ula synran ia u Champion ka Kettlebell Sandeep Sharma ban iakynduh ia u Myntri Rangbah ka Jylla hynne ka sngi Palei, ban lehkmen halor ka jingioh khur u Sharma ia ka takma rnong na ka Kettlebell World Champion ba 80kg ba long ha Poland.
U Myntri Rangbah ka Jylla ula ai khublei ia u Sharma bad ula iashondur lang ruh bad une u rang ialehkai.
Kane ka takma ba ioh khatduh, kala nang pynpaw nam ia u ha ka jingioh takma. Une u nongialehkai u dei ruh uba ioh ia ka takma ksiar ha ka WKSF Kettlebell Asia Championship kaba long ha Mumbai ha u Nohprah 2023.
Ha kane ka lympung, ula thaw record da ka jinglah ban rah haduh 94 sien ia ka kettlebell ba 24 kg tang hapoh ka 10 minit.
