Shillong, Naitung 08: Ka Jylla Niam Tura ha ka sngi Nyngkong ka la leh burom khatduh ia u Bishop ba nyngkong jong ka Diocese Tura u Bishop George Mamalassery ha Sacred Heart Shrine, Tura ha shwa ban pyndep ia ka lehniam leh rukom ba khatduh ha Cathedral of Mary Help of Christians, Tura.
Ïa ka jinglehniam ha kane ka sngi la ïalam da u Bishop Andrew R. Marak haka jingdon ryngkat ki Bishop naka thain Shathie Lam Mihngi (Northeast) bad kiwei ki diocese, ki phadar, ki sister bad brother, bad u nongïalam balang u Rev. Dilseng M. Sangma jong ka Balang Baptist, Tura, kum ki kumjuh ruh kiwei pat ki pastor na kiwei pat ki kynhun niam ki la iadon lang ha kane ka jingleit on tep.
Ha kane ka jingleit ontep, la donlang ruh naduh u Myntri Rangbah ka jylla u Conrad K. Sangma ryngkat ka kurim jong u ka Mehtab Chandee, u Myntri Rangbah barim ka jylla u Mukul Sangma, bad ki dkhot ka Garo Hills Autonomous District Council.
La sakhi ruh ia u paidbah ba bun uba wan ban ai khublei khatduh ia une u Bishop uba la shakri la 45 snem ia ka rilum Garo, ha ka jinglehniam kaba long ha Sacred Heart Shrine.
