Shillong, Iaiong 24 : Ka Committee bala thaw da ka Sorkar ban tyngkai bad pynneh pynsah ia ka kolshor bad ka pateng ki Garo, kala ai jingmut ia artylli ki jaka na ka bynta ka jingtyrwa ban shna sa ia u mot sahnam (cenotaph) ba-ar ban thoh ia ka kyrteng jong kito ki bym shym la don ha u mot Garo Labour Corp ba nyngkong ha Lower Babupara ha Tura.
Haba kren sha ki nongthoh khubor, u Chairman ka Committee bad Myntri Sorkar Marcuise N Marak ula ong “Naba don tang katto katne ki kyrteng kiba paw ha u mot sahnam, ka Committee ka sngew ba kiwei ki kyrteng ruh hap wad bad ban thoh ha u mot. Namar kata, ngi sa tyrwa sa ia kawei ka jaka. Ngi la dep ai jingmut ia artylli ki jaka-kawei ha ka Circuit House barim bad kawei ha ka Public School barim ha Babupara-ban tei ia u mot sahnam ba-ar”.
U Marcuise u pyntip ba ia kane ka rai la shim ha ka jingialang jong ka Committee kaba long ha ka 15 tarik Iaiong. Ia kane ka Committee la thaw hadien ba ki kynhun sengbhalang kila pyrshah jur ia ka jingpynpra ia u motsahnam ha Tura.
“Kumta, ka Committee kala phaikhmat bha sha ka jingtei pat ia u motsahnam. Baroh ki kynhun bapher bapher bad ki nongialam ka Jaidbynriew kila ai jingmut ba ia u mot dei ban shna ha kajuh ka jaka khlem da pynkynriah sha kiwei pat”.
U mot u dei u jingtei ba sah khana pateng la pateng ha Tura, uba la tei ban burom ia ki spah ngut ki Garo kiba la aiti iala ka jingim ha ka Thma Bah ba Nyngkong ha France bad ka jingwan phai jong ki katto katne kiba im ha ka 16 tarik Naitung, 1918.
Ha ka Thma Bah ba nyngkong, kumba 500 ngut ki Garo kila shah jied ha ka Sorkar Bilat ha India bad phah sha ka madan thma ha France. Ka kamram jong ki ka long ban rah ia ki mar ki mata, ki tiar thma, shna surok bad pynkit ia ki jingdonkam sha ki shipai kiba iakhun ia ki shipai German ha madan thma.
Na kine ki 500 ngut, 456 ngut kila poi sha France haba sdang jong ka thlang ba khriat bha jong une hi u snem. Ynda la kut ka thma ha ka 25 tarik Jymmang, 1918, la phah pat ia ki sha Marseilles Port ha France ban wanphai pat sha India. Kila wan poi ha Tura ha ka 16 tarik Naitung, 1918 hynrei na ki 456 ngut kiba poi sha France, tang 120 ngut kila wan phai im sha Iing.
Haba kylli, u Marak ula ong ba ia kane ka committee la bynshet ia ka kamram ba kan khmih ia ki kam ban pynneh pynsah ia ka kolshor bad ka pateng ki Garo.
“Kumba kyrpad da ki kynhun Sengbhalang, kan nym don satia ka jingtei ia ki dukan ha kane ka jaka” ula ong haba pyntip ba ka jingialang ba ar jong ka Committee kan sa long biang ha ka 30 tarik u Iaiong.
 ba-ar ban thoh ia ka kyrteng jong kito ki bym shym la don ha u mot Garo Labour Corp ba nyngkong ha Lower Babupara ha Tura.){kind=link}