Shillong, Lber 14: U Myntri Rangbah ka jylla u Conrad K Sangma, hynne ka sngi Palei ha ka jingialang jong ka Meghalaya Grassroots Music Project, Season 2, kaba la long ha Marriot Shillong, ula pynkup burom bad ai jingithuh ia ki nongrwai kiba la don ha ka kam rwai mynta la palat 15 snem.
Ha katei ka jingialang la iadonlang u khlur nongak phlim ka Bollywood u John Abraham.
Haba kren ha ka jingialang u Conrad K Sangma, ula pynkynmaw ia ki por kiba u sngewtynnad bha iaka tem ka put ha ka jinglong samla bad kitei ki dei ki sngi kiba u don iaka jingangnud, ka jingiakhun bad ka jingphohsniew kiba la buh ia ka jingkynmaw ha ka jingmut jingpyrkhat ka jongu.
“Man la ka por, haba nga mut ban thaw ia ki polisi treikam, nga ju kyrtiang dien ia kito ki sngi bad nga pyrshang ban ai ia ki samla kiba mynta ia ka rynsan, jingkyrshan bad jingbtin lynti ia kaba ngim shym la ioh ha ka por ka jong ngi” ong u Conrad.
Ula ong ba ka MGMP kadei kawei na ki prokram kaba la ai ia ka jinghun namar ka la wanrah ia ka jingkylla ha ka jingim jong ki nongrwai bad ki nongtem bad ki samla ia kaba lah ban sakhi.
Ula bynrap ba ka tem ka put mynta kala iapher bad ki por kiba mynshwa namar mynta kila don ki teknoloji bad ka rynsan ban ioh jinghikai haka rwai bad ka temka put.
“Nga kwah ba ki nongrwai bad ki nongtem kiba dang khynnah ba kin shim ia ka jingiarap jong ki kor teknoloji bad ban rah sha kawei pat ka kyrdan ia ka rwai bad ia ka tem ka put ka jongki” ong u Myntri Rangbah.
Ula ong, kiba bun ki samla kidei kiba la don lypa ia ka sap ha ka rwai bad ka tem hynrei kine ki dang donkam pat ban ioh ia ka jinghikai ba kin long kiba tbit bad kiba don ia ka sap ban pyni ha ki rynsan kum kiba la shemphang.
“Ka MGMP ka ailad ruh ia ki samla ba kin ioh ia ka rynsan bad ia ka jinghikai bad ka jingtip ban pule bad ban thoh ia ki jingrwai, khnang ba ka mishon ka jong ngi kan long kaba lah ban leh kum ha ki rynsan kiba heh ha ka pyrthei” ula ong.
U Myntri Rangbah ula pynpaw ruh ia ka jingmut ban ai jingkyrshan ia ki nongrwai bad nongtem da ka song tyngka khnang ba kin ioh thied iaki tiar tem.
“Ka lah ban don ka Selection Committee bad lyngba ka jingjied ha ka rukom kaba biang bha, ki nongrwai bad ki nongtem kiba dei hok kin ioh ia ka jingiarap da ka song tyngka” bad ka ong, ia ka MGMP dang donkam ban pyniar shuh shuh lyngba kiwei pat ki sienjam kum ka jingai jingiarap pisa, ban ai jingkyrshan ia ki Music Club kiba don ha ki shnong ki thaw bad kumta ter ter.
U Myntri Rangbah ula kular ruh ban pynioh ia ka Ibanez Guitar ha uwei u nongtem uba don jingduna ha ka dkhot met uba la pyni iala ka sap ka phong ha katei ka jingialang bad ula pynpaw ha u Myntri Rangbah ia ka jingthrang ban don kawei ka Guitar.
U Conrad ula pynthikna ba ka MGMP kan dei ka prokram kaban dang iai bteng bad ula kyntu ia ki nongrwai bad nongtem ba kin ialeh ban kyntiew ha ka jingdon ia ki nongkyrshan ki jongki bad ban pynsaphriang ia ka khubor kaba bha halor ki mat kiba iadei bad ka imlang sahlang ban kiar ia u Droks, ban lehkhuid lehsuba, ban iada ia ka mariang bad kiwei kiwei.
Katba u John Abraham, ula ong kaei kaba ka sorkar jylla kala leh ban ai ka rynsan ia ki nongialehkai bad ki nongrwai bad ki nongtembad ia ki samla ka long kaba biang bha.
“Bteng ban pynim ia la ka jingangnud bad sngewthuh ba phi long uba donbok bha namar ba ngim shim la ioh satia ia kum kane ka jingkyrshan bad jingbtin lynti” ong u Abraham.
U Myntri Rangbah bad ki heh ki haiñ, kila pynkup burom ia u Tengnang Sangma, Gracyl Ropmay, Starly Shullai, Felix Langstieh, Cinda Sangma, Amabel Susgni bad Desmond Rimaki Sunn bad la pyllait paidbah ruh ia kawei ka kot kaba la tip kum “The Songs of Our People,” kaba la thoh da u Anurag Banerjee.
Ka MGMP Season 2 naduh ba la sdang ia ka ha ka 4 tarik u Risaw 2023 la pynlong 730 ki prokram ha kylleng ka jylla ia kaba la wan ban iashimbynta da palat 1000 ngut ki nongrwai bad nongtem. Ka jingioh kamai jong ki nongrwai bad nongtem kala kiew na ka T.10,000 sha ka T.12,000 ha kawei ka prokram jong ka Season 2.
