Shillong, Nohprah 21: Ka Northeast Institute of Professional Studies (NeIPS) East Khasi Hills hynne ka sngi ka la sam ia ki tiar shna mobile sha ki 100 ngut ki samla kiba la pyndep ia ki jinghikai pyntbit shna Mobile Phone kum shi bynta ban pynshlur ia ki ban sengkam lajong.
Ia kine ki tiar la sam ha ka jingdon lang ka Administrative Officer jong ka tnat MSSDS ka kong Masarsuk Tariang, ka kong Audrey M Khonglam SDO MSSDS u bah Michael Thongni uba dei u khliehduh bad trai ka NeIPS.
Haba kren ha kane ka sngi ka kong Masarsuk Tariang ka la iaroh ia ka jingtrei shitom u bah Michael Thongni uba len lade ban kyntiew ia ki lad kamai jong ki khun samla ka thaiñ lyngba kane ka shlem ai jinghikai NeIPS bad la pynsngew ruh ba u long u samla u ba iohi jngai na bynta ban kyntiew ia ka jylla ha bun ki liang.
Ka kong Marsasuk kala iathuh ba u bah Micheal u ju wan man ka por sha ka ophis treikam jong ka MSSDS ban pynsngew ba ki khun samla kin ioh ia ka jingkyrshan na ka sorkar.
Kala iathuh ba ha u bnai Iaiong 2022 ka sorkar jylla lyngba ka MSSDS ka la pynmih ia ka project SKILLS MEGHALAYA ban iarap kyrpang ia ki khun samla ban ai jinghikai pyntbit ha ki lain bapher bapher lyngba ka Institution kum ka NeIPS.
Naka liang ka kong Marsasuk ka la kyntu ruh ia ki samla kiba la shim ia ka jingshah pyntbit ne Training ki dei ban pyndonkam hok ia ka sap kaba ki la dep shah pyntbit namar kan long ka jingkyrkhu ia ka lawei jong ki bad ka la ong ruh ba ka jingiaishah kadei kawei na ki lynti ban ai jingjop ban poi sha kliar jong ka thong, namar haba ki ioh iaki tiar ki lah ban sdang kam da kaba shong ha ïing bad pynkhlaiñ ia ka jingpyntip ban treikam lyngba ki kor internet ka juk mynta.
Naka liang u bah Michael Thongni ula ong ba u dei uwei na ki nonghikai ha kawei na ki skul bah ha ka jylla Kerala bad u la iehnoh ia ka kam namar u angnud ban don ha jylla la jong ban leh eiei na ka bynta ki khun samla halor ka jingkyrduh kam, kumta u la shim ia ka sienjam bad thong ka long ban leh ei ei na bynta ban iakhun pyrshah ia ka jingkyrduh kam hapdeng ki khun samla bad dei ha ka snem 2014 da i bor barit u la sdang shakri na Nongstoin bad mynta u la don ha kylleng ki district ka jylla Meghalaya lyngba kane ka shlem ka kylla long ka jingkyrmen ia shibun ki khun samla.
U bah Micheal ula ong haba u iaid ia kane ka kam treimon sngewbha kamdei kaba suk wat la ki jingeh bad ki shiah ba thar kimdei ban pynduh mynsiem hynrei ki long pynban ki maw jingkieng ba nga lah ban kyntiew na bynta ka jingbha ha ka imlang sahlang.
U la ong ba ki samla ki long kum ki symbai namar ka imlang sahlang ka kyrmen bad shaniah ha ki iaka lashai, kumta to jied ia ka nam babha ban long nuksa ia kiwei ki para samla bad u la kyntu ia ki samla bakim dei ban ap khmih lynti tang ia ki kam sorkar hynrei ngi dei ban long ki samla kiba lah ban thaw kam ruh na lade lyngba ki sap ba la dep hikai khnang bakan long ka jingkyrkhu ia kiwei pat bad u la pynkut da kaba ong, haba skhem ki samla skhem ka lawei ka jylla.
