Shillong Nailar 16: Ka National Institute of Disaster Management (NIDM) bad ka Ministry of Home Affairs jong ka Sorkar Pdeng ryngkat ka jingiatreilang bad ka Meghalaya State Disaster Management Authority (SDMA) kila pynlong ia ka jingai jinghikai kaba 3 sngi halor ka phang ‘Psychosocial Care in Disaster Management’ kaba la long ha Conference Hall jong ka Meghalaya Administrative Training Institute (MATTI), Mawdiangdiang.
Kane ka jingai jinghikai kaba la sdang hynne ka sngi la plie da ka Ka Commissioner and Secretary jongka tnad Revenue & Disaster Management ka Kong R. Lyngdoh bad kane ka jingai jinghikai kan kut haka sngi Balang jong ka taiew.
Ka jingthmu jong ka prokram ka long ban sngewthuh iaki jingdonkam jong kito kiba la lait im naka jingwan lynshop ka bor mariang bad ban sngewthuh kumno ki paidbah ki sngew haka por ba ki don hapdeng ka jingeh bad jingtynjuh, ban shim ia ki sienjam kumno ban ai jingsumar, ban sngewthuh iaka rukom treikam jong kito kiba ai jingsumar ia kiba shem lanot, ban pyndonkam iaki buit ban ai jingsumar ia ki khynnah, longkmie bad kumno ban sumar sukher ruh ialade ha kum kitei ki por kaba bun kam bha.
Ka Kong R Lyngdoh kala iaroh iaka jingnoh synniang jong ki nongtrei na ki tnad bapher ha ka por ba wan lynshop ka bor mariang bad kala ban jur ruh iaka jngdonkam ban don iaka jingai jingsumar ia ki briew kiba shem lanot kiba don hapdeng ka jingsngewsih kthang.
Katba u Dr Ajinder Walia, Associate Professor, NIDM u la ai ka jingkren kaba bniah shaphang kane ka prokram ai jinghikai bad kumno kane ka prokram kan pynkup bor ia ki nongiashim bynta bad ki buit treikam ha kaban ai jingsumar ia ki briew bad iaka imlang kiba la shah ktah ka jingmut jingpyrkhat naka jingwan lynshop ka bor mariang.
