Shillong, Risaw 12 : Ka Mihmyntdu Community Social Welfare Association (MCSWA) kala pynlong ia ka jingai jinghikai ba lai bnai kynthih ia ki samla ka dong ka thain ba kin nang ban sumar ia ki nongpang hala iing (Home Health Aid) haba donkam kyrkieh.
Ia kane ka jingai jinghikai bala pynlong hapoh ka Meghalaya State Skill Development Society (MSSDS) la plie pyrda hynne ka sngi Balang ha ka jingialang bala iadon ryngkat u ADC ka West Jaintia Hills kong DD Syngai kum i kongsan bad i Dr N Nongpluh Medical Superintendent ka Dr. Norman Tunnel Hospital kum i symbud kongsan.
I Dr. JN Shullai jong ka MCSWA ila pyntip ba ki samla ba wan shah hikai, kin ioh ia ki jinghikai kumno ba kin symar ia ki nongpang kynthup ia ka jingthew blood pressure, ban batai ia ka rukom dawai bad kiwei kiwei.
Haduh 30 ngut ki samla kin ioh ia ka jinghikai kaba lai bnai kynthih.
Haba ai jingkren, I Kong DD Syngai ila ong baka MCSWA ka dei ka seng kaba pher bha bala pynkha naduh u snem 1982 bad kaba dang shakri ia ka imlang sahlang haduh mynta la ka dei halor ki kam ki nongdih drok, ki nongdie met bad mynta sa ka hikai ia ki samla ba kin sumar ia ki nongpang hala iing.
I la ai jingiaroh ruh ia ki samla kiba la wan shakhmat ban ioh ia ka jinghikai halor kane ka kam kaba bun ki leh kiar.
Haba kyntu ia ki ban trei shitom, ila ong ba ka pisa kam dei satia kaba don dor ha kum kane ka kam haba ianujor bad ki jingkyrkhu kiba wan na ka.
I Dr Nongpluh ila ai ka jingiaroh ia ka MCSWA bad ong ba kane kan dei ka sngi sah jingkynmaw ia ka seng namar shisien ba kine ki samla kila pyndep ia ka jinghikai, kin sa lah ban ai ka jingshakri shirta jingim ia ka imlang sahlang.
