Shillong, Risaw 01 :Ka Iingkashari Meghalaya High Court kala ai bah jamin ia u Vice President ka BJP bad MDC ka Tura Bernard N Marak, uba la shah kem halor ka jingkynnoh pyniaid ia ki kam khaii met hapoh ka farm house jong u ha West Garo Hills District.
Ia kane ka hukum la pynmih da ka Single Bench jong ka Iingkashari haba shong bishar ia ka application bala buh da ka kurim u Bernard hynnin ka sngi thohdieng.
“..Ia kane ka application la shah,la bthah ban pyllait noh ia u nongshah kynnoh, Bernard N marak da ka bah jamin, lada um don shuh kiwei kiwei ki case pyrshah ia u kaba shong ruh ia ki kyndon ba u hap ban bud : Ba um dei ban phetrieh ne pynjulor ia ki sakhi satar, ba um dei ban mih na India khlem da ioh jingbit na u I/O lane ka Iingkashari. U dei ban ai ka jing iatreklang bad ka jingtohkit haba donkam bad ba u dei ban buh ia ka bond shimet ba T. 50,000” ong u Justice W Diengdoh ha ka hukum.
U Bernard ula shah kem ha ka 26 tarik Naitung na Hapur District jong ka Jylla Uttar Pradesh, hadien ka jingphet na kti ka ain halor ka jingkynnoh pyniaid ia ka ktem awria ha ka farm house shimet jong u, ka ba lam sha ka jingioh pyllait ia 5 ngut ki khynnah bad kem ia 73 ngut ki briew.
Kane ka la jia hadien ba ki pulit ka West Garo Hills kila pynmih ia ka lookout notice sha baroh ki police station ha kylleng ki Jylla ka Ri ban lapdien ia une u MDC ka BJP.
Ia u Bernard lah ioh kem da ki pulit ka Uttar Pradesh halor kane ka lookout notice ba lah phah da ki pulit ka jylla, katba ki dang khynra kali ha surok National Highway.
Ka ïingkashari na West Garo Hills ka la pynmih ia ka non-bailable warrant of arrest pyrshah ia u Bernard Marak, uba dei ruh u chairman ka kynhun kiengatiar Achik National Volunteer Council – Breakaway (ANVC-B) ba lah pynduh pyndam.
Ia u Bernard lah pynngat ha ka kyndon jong ka Immoral Trafficking (Prevention) Act, 1956 bad ia ka case la register ha Tura women police station.
Haba pynwai ia ka jingpan bah jamin, ka Iingkashari ka shem ba ki jingkynnoh, watla ki dei kiba bun, ki dei kiba la kynnoh pyrshah ia u Bernard nalor kiwei kiwei.
Ka jingshisha ka long ba une u Nongshah kynnoh u dei u trai jong ka Nongkynti ba jia kane ka jingjia ka bym lah satia ban kyntait.
“Hynrei na ki jingbatai jong ki Nongsaki bad ki sakhi bala ioh, kam shym don sati aka sakhi kaba pura ban pynthikna ia ka jingdonkti jong une u nongshah kynnoh bad ruh ki sakhi satar ba ia kane ka jaka la pyndonkam kum ka jaka khaii met nalor ka sakhi ban pynshisha ba ka kam khaii met kala iaid ha kane ka jaka. Ka sakhi kaba la mih haduh mynta ka long ba kane ka jaka ka dei ka jaka ba ki briew ki ju wan bad leh sngewbha bad ia ki kamra la ju ai sah sha ki briew kiba lah lehse kiba leh ne bym leh ia ki kam shongkha, bad lada don ruh, la antad b aka dei kaba la leh da ka jingiasngewthuh jingmut lang”.
Ka Iingkashari ka ong ruh ba ka jingkynnoh ba kawei ka Khynnah kala shah leh khlem akor ha ka por ba khynra ia kane ka jaka ka dei ka bym lah ban pynthikna namar kam shym don satia ka sakhi ia ka jingdon bynta jong u nongshah kynnoh (Bernard) bad kane ka case kaba la kyntiew ha ka case dairy ki Pulit.
U Assistant Advocate General ka Jylla ula pynpaw ia ka jingbym sngew iahap ia ka hukum bala pynmih da u Session Judge kaba la kdew da u Nongiasaid jong u Nongshah kynnoh bad ula ong ba da kine ki jingbatai u nongiasaid ain, u Session Judge ula shim ia ka rai ba ym don case satia pyrshah ia u nongshah kynnoh (Bernard) hapoh ki kyndon jong ka IT
IT (Prevention) Act kaba lah ban ktah ia ka jingtohkit ba dang iaid mynta bad kaba lah ruh ban ktah ia ka jingtian bishar ia ka case ha ki sngi ban wan.
U AAG ula ong ba une u Nongshah kynnoh u dei u Dkhot jong ka Political Party kaba paw bha bad da ka jinglah jong u ban iadei bad ki bor ba halor, lada shah ban bah jamin ia u, ka lah ban don ka jingpynjulor ia ki sakhi satar kaba lah pat ban ktah ia ka jingiaid ka jingtohkit.
