Nongpoh, Lber 24 : Ka Dorbar Shnong Mawpun Kshaid ha ka sngi Nyngkong, kala leit ai dorkhas sha u Deputy Commissioner ka Ri-Bhoi, ban pynthikna ba ka surok 4-lane lane ka “Express Corridor” na Umiam sha Malidor, kan ym ktah satia ia ka tyllong umbam umdih jong ka Shnong.
Ki Nongialam Shnong bala ialam da u Rangbah Shnong Bah Bandari Ryntathing, kila iakynduh markhmat ia u Deputy Commissioner bad iakren sani bha halor kane ka mat.
Haba iaren bad ki lad pathai khubor, u Bah Bandari ula iathuh ba kane ka jingai dorkhas kam mut satia ba ka shnong ka pyrshah ia ka surok fourlane hynrei ka mat ba kongsan ka long ba kane ka surok kam dei ban ktah ia ka tyllong umbam umdih-kaba bsa um ia ki nongshongshnong ka thain.
U iathuh ba ha ka jingiakynduh jong ki Nongialam Shnong bad ki riew shemphang ka kompani ka ban pyntrei ia ka surok kaba iaid lyngba u Lum Sohpetbneng, la pynthikna ba kane ka surok kan jngai kumba 140 meter eiei na ki tyllong umdih. Hynrei u ong ba ka Shnong ka kwah ban ioh da ka jingthoh bad ka jingkular kaba shai halor kane.
U pyntip ba u Deputy Commissioner ruh ula ai ka jingkular ba kin sa shimkhia bha ia kane ka kam bad kin khmih bniah ba ka surok kan ym ktah satia ia ki tyllong umbam umdih.
