Shillong, K’lyngkot 27: Ka Hynñiewtrep Border Disputed Redressal Forum (HBDRF ) ha ka sngi Nyngkong, kala ai dorkhas ha u Deputy Commissioner ka West Jaintia Hills, ba lyntu ban peitthuh bad pynneh ia ka shongsuk shongsain ki paid Khasi-Pnar ha Block-I ha kane ka por elekshon MDC.
Ka HBDRF hapoh ka jingialam u Chairman Bah Chandame Sungoh, kala pyntip ha u DC ba ha ki por elekshon bala dep,ka ju don ka jingmaham, ka jing pyntieng pynsmiej bad jingpyndik ia ka leit ka wan ki Khasi Pnar da ki briew bad ki kynhun jong kawei pat ka Jaidbynriew ha ka thain.
Ka HBDRF ka kyntu ia u DC ka WJH ba un iakren bad u DC ka West Karbi Anglong, ba un pyntreikam ia ki ain ki kanun ban pynneh ia ka suk ka sain bad ban nym shah pyndik ka leit ka wan ki paid Khasi-Pnar ha kane ka por elekshon jong k JHADC ban long la 21 tarik Rymphang.
U Bah Chandame u pyntip ba na ka liang jong u DC, ula ai ka jingkular ban shimkhia bha ia kane ka kam.
